Ochimashi intoktsü atema yimya melenshitsüla: Rajnath Singh

New Delhi, Aenjeti (Jan) 27 (Agencies): Union Home Minister, Rajnath Singh-i, inyakyimtem nung temelenshi ajanga ochimashi tera nungi atsüteta meindoktettsü, saka iba atemaji nüburtemi pei yimya tamajung intoktsü nüngdak, ta metetdaktsü.
“On the Trail of the Black” kaket sayaba sentong nung pai, Ato kilonser, Narendra Modi-i ochimashi anema inyakba nung tashishitsü mali, aser linük nungi ochimashi intoktsü atema pai kanga meranga inyaker, ta ashi.
“Küna sensaksemba mapang nung Ato kilonseri teti, ‘ochimashi meindokra kodaser asenoki sensak tia aser tanga onüktem anema raratettsü’ ta jembir,” ta Rajnath-isa metetdaktsü.
“Iba sorkar mezüng cabinet senden nung Supreme Court-i tuyuba ama black money meyipa bener arutsü atema Ato kilonseri SIT ka tentettsü atema telemtetba agia liasü, koba ajanga pai ochimashi tera nungi indoktsü atema inyakba sayur,” ta paisa ashi.
“Ochimashi ali tashibo onok indang tenrenlok nükjidong mataloktsü. Iba ya asenok ajak atema tebilemtsü onük ka lir,” ta Home minister-i ashi.
Tanü iba sentong nung NITI Aayog CEO, Amitabh Kant, Chairman, Economic Advisory Council to the Prime Minister, Bibek Debroy, Nehru Memorial Museum Library Director, Shakti Sinha, Swadeshi Jagran Manch National co-convener, Ashwani Mahajan, NITI Aayog OSD, Dhiraj Nayyar aser NITI Aayog ketdangser, Bhavana Kohli nungeria o lemtepba nung shilem agia liasü.