Ochimashi ken-o bushisüngdangtsü asoshi PM tang mepishir

Guwahati, January 11 (Agencies): Jeevan Dhara ochimashi ken-o police ajanga bushisüngdangba nung molung masüba agi, iba company nung tamalen inyaker nisung ishikati Prime Minister Narendra Modi tang tiyongi aita parnok dang temaba ketdangsürtem nem bushisüngdang südaktsütsü asoshi mepishia zülua liasü.
“Jeevan Dhara Finance Ltd nung Managing Director, Acharjee aser ketdangsürtem-i sen magütsüi jena ao. Taoba küm Paltan bazaar police nem complain agütsüaka bushisüngdang masü,” ta iba company nung tamalen inyaka alir Kanak Das aser ano nisung pezüi zülua liasü.
Police osang ajanga ashiba agi, Beltola nung alisang Acharjee-i pa indang kiojen aser osettem yokdoker ajen.
Assam nung iba company nung sen crore 40 inokja alir costumer aika ashiokja liasü. Iba company West Bengal, Assam, Odisha aser Tripura nung amenlok aser iba company ajanga sen terara inoktsür aika tang nungi sarutenba senji crore 30,000 lir, ta CBI ajanga tamalen osang metetdakja lir.