Ochimashi ken o nung alirtem meshimtsüla: NPRAAF

Kohima, January 23 (TYO): Veterinary Doctor ka, shiba Deputation nung Additional project Director DOSE (Directorate of school education department. Govt. of Nagaland) inyaka liasü; tesülen Vigilance & Anti-Corruption Police Nagaland: Kohima-i October 5, 2018 nü jaokba shidi agutsü aser tangar nisung 14 den külemi Mid-day meal scheme dak sendakba ochimashi tai tongloktsüba nung October 8, 2018 nü Sl. No 3 nung pa tenüng adokja lir, ta osang angazükogo, ta tanü Information & publicity wing NPRAAF-i sangdong ka ajanga metetdaktsü.
“Sensaker school tanurtem atema mid day meal senotsü chitsübaji ken oji tulu, aser iba ken o nungji aitsüra iba nisungbaji ita 6 tepoukdak ayutsü akok, mesüra küm 5 tashi atsülanga tepoukdak ayuba den külemi senchi achitsüa akok, mesüra temerenshi anaprongji agutsütsü akok; ibaji Prevention of corruption Act 1988 kübok Arrla 8, 9 nung shia lir,” ta NPRAAF-isa metetdaktsü.
“Iba ochimashi ken o ya maneni bushisüngdangdar, aser tang asüngdangyaba nisungbaji iba ken o nungi jenbua mali, ajisüaka linük nung tematiba Administrative service- Indian Administrative Service (IAS) nung shimoktsü atema state sorkari pa tenüngji benoka lir,” ta sangdong nung shia lir.
“Sorkari item ama ketdangsertem nem sempet magutsütsü NPRAAF-i akhanger, kechiyong ibaji ajanga state tajungtiba agi kanga nendaka tenzükertem teimla samatsü,” ta sangdong nungsa shia lir.
State sorkari tashi mangai tenüngji benoka inyakra NPRAAF-i ochi temeden atema maneni iba ken o asoshi inyaktsü, ta parnokisa metetdaktsüogo.