Ochimashi ken o nung Kerala Excise Minister Babu anenogo

Thiruvananthapuram (Kerala), January 23 (Agencies): Yi ayokba license renew sutsütsü atema yi ayoker kibur Biju Ramesh dang nungi  Kerala Excise minister, K Babu-i süpokrem lakh 50 agi ta tai tonglokja aliba nung ajemdaker Public Interest Litigation (PIL) ka benok, iba sülen court-i VACB dang iba ken oji ita ka tsüngda bushisüngdangtsüla ta tuyuogo.
Court-isa, süpokrem agütsübaji-a ozüng alema lir ta shia Ramesh anema-a ken o benoktsüla, ta ashi.
Court-i, bushisüngdangba osangji ita ka tsüngda agütsütsüla, ta tuyuogo.
Court tetuyuba nung ajemdaker Opposition lenir, V S Achuthanandan-i, Babu ji tangsa minister menden nungi anensüla ta ashi.
State nung Congress tongti, V M Sudheeran-i, court tetuyubaji party-i süoki ia agir aser kobi melii telemtetba tajuing ka agitsü, ta ashi.
Tawa Kerala Congress (M) Mendenbuba, K M Mani-ia yi dokan kiburtem dang nungi süpokrem agiogo ta tai tongloktsüba nung ajemdaker iba ken o bushisüngdangtsü atema pa finance minister menden nungi anentsüsa akum.
Tanü osangbenertem den jembidang Babu-i, court-i obendang agütsübaji pai agizüker, ta ashi.
“Ni office toktsütsü melunga alibaji Chief Minister nem ni metetdaktsüogo,” ta ashi.
Babu-isa, “CPI (M)-i yi dokan kiburtem den senteper tasa tamajung yanglua ni anema apusoogo. CPI (M)-i parnok dang, par party sorkar tashii tanaben arura parnoki tanaben yi dokantem lapokdaktsütsü ta nangzüka lir,” ta ashi.