Ochimashi ken o nung Maharashtra Minister Eknath Khadse anenogo

Mumbai, June 04 (Agencies): Ochimashi ken o aika nung tai tongloktsüba sülen tanü Maharashtra Revenue Minister, Eknath Khadse-i pa menden toktsüogo.
Ato kilonser, Narendra Modi aser BJP Tir, Amit Shah nati ochimashi maparen magizüktettsü ta nangzükba sülen tang mezüng BJP minister ka menden nungi anener asütsü.
Tanep arishi küm 64, Khadse-i state Chief Minister Devendra Fadnavis meyong official kidangi oa pa nem sodi meshiba shidi agütsü.
Anogo ana tejaklen Fadnavis-i Delhi nung Modi aser Shah na dang Congress, NCP aser AAP-i minister nem tai tongloktsüba indang metetdakja liasü.
BJP den teloktep, Shiv Sena-ia minister anentsütsü atema takhangba agüja liasü. Iba ya tang mezüng state nung BJP-i aniba sorkari maksü angur asütsü.
Pune nung ali alitsü tezüngzüktep nung ochimashi ken o aser Karachi nungi telungpur tetsüdi, Dawood Ibrahim-i pa indang mobile phone nung call asüba aser süpokrem ken o tem nung pa nem tai aika tonglokja lir.
Iba dak sentakba nung Maharashtra Congress tongti, Ashok Chavan-i, “Menden nungi anenbaji ajanga dangbo mepiritsü. Khadse dak sentakba ochimashi ken o temji temaba jenjang nung  judicial-i bushisüngdangtsüla. Onoki iba sorkar dak melung malemer,” ta ashi.