Ochimashi ken-o nung Samsung tekolakba, Lee puogo

February 16, 2017 nü Seoul Central District Court nung Samsung Electronics co-vice chairman, Jay Y. Lee arudang agiba noksa angur.

Seoul, February 17 (Agencies): South Korea sorkar nung ketdangsür densema ochimashi inyakba ken-o ka nung Samsung company tekolakba, Jau Y. Lee, Hokulbar anepdang puogo.
Arishi küm 48 tain, Lee ya South Korea nung takar kibong ka nungi lir.
South Korea indang Tir, Park Geun-hye, taoba küm December ita nung mapa nungi anendaktsüba maparen nung Lee ya densema lir, ta temolung melemi liasü.
Lee ajanga aibelen mapa inyakba asoshi tejangja kuli agütsütsü asoshi, sorkar tenüng nung obendanger nem anogo ter agütsütsü aser iba mapang atsülangtsü akok. Iba kuli agütsüba sülen, court ajanga ita asem tsüngda nung obendang agütsütsü.
“Lee apuba asoshi ken-o benoka jembitsü mesüra pa bail nung agizüktsü asoshi ano kecha telemtetba magi,” ta Samsung Group indang otongdar ajanga ashi. Samsung aser Lee ajanga aibelen mapa inyaka mali, ta ashir.
“Tarutsü nung obendang agütsüba mapang ochiji temai adoktsü asoshi onoki tajungtiba nung inyaktsü,” ta Lee apuba sülen, Samsung Group ajanga metetdaktsü.
Lee ya aputsü asoshi iba kasa court nung asüngdang, saka iba court ajanga memolung. Iba sülen sorkar tenüng nung obendanger-i Lee anema Mongulbarnü, ken-o tasen bener aruba ajanga pa apu.
Sorkar tenüng nung obendanger-i Samsung Electronics indang tir, Park Sang-jin aputsü asoshi asüngdang, saka court ajanga magizük.
Lee apuba ajanga Samsung nung anogoshia inyakba maparen nung timtem malutsü saka tongtibang telemtetba nung tetsükdaktsü alutsü südi, ta alima nung shishilembar mongintemi ashir.
Lee tebu indang temolungjang agi mapa junga meinyakba ajanga 2014 küm iba mapa ya Lee nem agütsü.
2015 küm Samsung unit ana nungi ka kümdaktsütsü asoshi Sorkar nungi teyari agütsütsü nükjidong nung, South Korea Tir, Park indang medemtsür, Choi Soon-sil den sendaktepa aliba telok nem sen million USD 37.74 süpokrem agütsü, ta sorkar obendangeri ashir.