Ochimashi ken o nung Tejashwi-i CM menden nungi alutsü akhanger

Patna, August 23 (Agencies): Tanü Bihar Assembly nung opposition lenir, Tejashwi Prasad Yadav-i NGO ka densema ochimashiba ken o nung Chief Minister, Nitish Kumar aser Deputy Chief Minister, Sushil Kumar Modi na menden nungi alutsüla, ta takhangba agütsü.
Rashtriya Janata Dal (RJD) aser Congress MLA temi iba ochimashi ken o nung ajemdaker senden tembangtsü takhangba agütsü, aser ibaji langzüa Speaker, Vijay Kumar Chaudhary-i, sorkari iba telangzübaji mapang shidak nung agütsütsü, ta metetdakja liasü.
RJD aser Congress züngsemtemi yimyim ayima ola adokdang RJD tongti, Lalu Prasad Yadav’er jabaso aser taoba sorkar nung Deputy Chief Minister inyaksang, Tejashwi-i, ‘Senpong nungi auyar kati kechi telangzüba agütsütsü?” ta asüngdang.
Tejashwi-i “senpong nungi auyartem” ta ajabaji chief minister aser deputy chief minister na dang ajaba lir.
Tanü iba senden nung chief minister, Nitish Kumar bo maliasü, kechiyong tang pa tzümetsüng agi kongshiba district tem- Kisanganj, Araria aser Katihar semdanga senzüdar, ajisüaka Deputy Chief Minister, Sushil Kumar Modi bo senden nungji liasü.
Opposition MLA züngsemtem aija state minister aser BJP lenir tain, Nand Kishore Yadav-i, “Item ama o mejembidang ochimashi ken o alirtemi aaktsüla,” ta ashi.
Tesülen osangbenertem den jembidang Modi-i, Speaker-i ‘senpong nungi auyartem’ ta asüba ojibo indoktsü ta imlaa liasü, ta ashi.
Deputy chief minister, Modi-isa, Tejashwi kanga jashibaji ita 18 tsüngda pa tashi makai akümba agi lir, ta ashi.
2015 küm arishi küm 27 Tejashwi aser tedi, Tej Pratap Yadav na MLA akum aser pa Deputy chief minister shima liasü.
Modi-isa, “Pa (Tejashwi) ya tanur ka dang lir, aser yimtenren inyakyim indang angazüktsü ano aika lir,” ta ashi.
Ano külen JD(U), principal general secretary, K C Tyagi-ia, “Pa (Tejashwi) dang nungi anasü agi tambotemia item ama o jembibaji majung,” ta ashi.