Ochimashi sen nokdangtsü atema sen lakh 3 ser tema transaction nokdangtsüla: SIT

New Delhi, July 14 (Agencies): Black money atema tentetba Special Investigation Team (SIT)-i, linük rongsenkettsüng nung ochimashi sen nokdangtsü atema sen transactions lakh 3 ser tema nokdangtsüla iba den külemi nija kati sen lakh 15 dak tema bener mesenzüdaktsütsüla, ta benokogo.

Ochimashi sen nokdangtsü atema Justice, M B Shah (retd)-i aniba SIT-i pongububa report Supreme Court nem agütsüogo.

SIT-i, ochimashi sen aika rizünga ayur aser ‘cash’ nung amshir, ta ashi.

“Linük balala nung iba dak sentakba ozüng balala shisadangba den külemi sen transaction shisadangba sülen SIT-i, sen transactions atema telatetba ka ayutsüla ta shisatet,” ta official sangdong ka ajanga metetdaktsü.

SIT-i, “Sen lakh 3 ser tema transactions nokdangtsüla aser item ama trancaction ji ozüng alema, aser ozüng kübok temerenshi lir ta Act ka yanglutsüla,” ta ashi.

SIT-isa, mapang shia ochimashi sen aika ozüng amer agency temi apur, aser ibaji sen transaction telatetba ka ali nungang nokdangtettsü, ta ashi.

“SIT-i nija kati sen lakh 15 dak tema mabentsü benokogo,” ta kasa sangdong nung shia lir.

Nisung kari mesüra industry kari sen aika abentsüsa kümra parnoki iba tesem nung Commissioner of Income Tax dang nungi temelaba tama agitsüla, ta SIT-isa benoka lir.

You must be logged in to post a comment Login