Ochimashi senmang

Kiburi pa kübok inyakertem bushir saka inyakertem ajak agi 1551 bushiaka mangur, anungji anogo 30 nü tsüngda shitakba taküm lira ki bushia arung ta sangdongba osangji inyakertem asoshi taochi osang ka asütsü saka kiburbo kanga akoksadagi. Kiburji Nagaland School Education department aser inyakertemji la kübok inyakertem lir. Nagaland nung School Education kübok inyakertem shimba nung meshitak shimba, inyakertemi pei nem lemzüktsüba mapa shitak meinyakba aser peisasa pei melen tangar inyakdaktsüba mapa aser otsütem agi School Education department kanga menena lir. Aji oda, department-i memetet tesayur taila shimba tashi Nagaland School Education department nungbo atalokba osang angashia aruogo. Item ama osang tamajungtem dak alaka Nagaland nung government school-tem indang jembidang takok tajung anguba indang jembinüaka tejembitsü maka akümer. Iba ama tia nung Nagaland kin ka tongtiret kangshidagi. Atangji, item temenen aser tebilemtsütemji merüktettsü asoshi department-ia mapang shia merangdangba angur. Ajisüaka, merangdangba dak alaka department inyakyim aser school-tem tajungba akümba mangur. Ibayongji, anosa maneni department-i la kübok inyakertem bentettsü merangdangba mapa ka inyakba asenoki angashir. Atangji, School education department mejungi akümbaji tang ajungbena akümba masü saka ochimashi tashidak agi shirang tenzüker küm talangka arur. Shitakba agibo asen lima nung senso ajak ochishia alitsü aser pei lima meima yimten aser lokti tenzüktsü atema shisatsü tajung apuoktsüba department-ji School Education asütsüla. School nung sayutsüba education-ji zülutsü aser azüngtsü angazükdaktsüba kisüng masü saka Tsüngrem akümtsübutsü, pei tsürabur aser tesayurtem dang tashi angatsü aser kechi mapa inyakdir inyakaka ochishia aser nendaka inyaktsü sayutsübaji tongtibangba aser itemjiang senso ka atema Education tamendakdakji lir. Ajisüaka, asen lima nungbo department-tem rongnung ochimashi tokteper amai ochimashi inyakba nung toktepba angur . Aji oda, ochimashi inyaktsü toktepba nung sempet agütsü nungbo department-tem rongnung School Education department-i mezüng mesüra tanabuba takok jenjangbosa ngutetla ta asadangtetter. Nagaland asoshi tia tamajungtibaji aji lir. Atangji, ochishia inyakba department-bo kata malitsü südi, saka tanga department nung ochimashi mapa inyakbajibo School Education department-i danga tanurtem dang shitak sayutetra, parnoki sayuba tanurtem jagi par mapang nung metongshitettsü.Iba tangatetba nung tang danga tebu metsükshir, School Education department-i ketdangser kar senotsü ajangzüktsü mechi Naga nunger tanurtem akoksadaktsüba aser Nagaland tia raksatsüba aibelen ajak metongshi imlar. Atangji, küm paikaji ochimashi inyaka aruba mapatem toktsütsübaji tanga teinyakdak purtem asoshi tatidang tuluka asütsü. Tang department-i inyakertem bushia aodang mangurtem rongnung, school-tem nung inyakertem mangubajibo yutsür, Directorate nung inyakertem dena mangubaji tesüngmangtsüka lir. Ashiko, item rongnungji karbo shiranga alitsüa akok mesüra kodamasüba timtem kar ajanga nokdang asütsüa akok saka nisung meyirijang dak tali ita senbo shitak agizüker saka tejakbo mangur ta asüba jakla aser inyakyimbosa anendaktsütsüla. Joko karbo küm aika shitakba nisungbo mali saka tiyazü aser taila nisung tenüng nung ita sen agizüka agia alitsüa akok. Item angati ita sentemji agia mapa nungi retire asütsü mesüra tangaleni aotsü aser pa mesüra la sülen shibai melendir ano kasa temoatsü (shitakba nungbo atakatem)-ji maneni agiyonga oa alitsüa akok. Aji oda, shiba mapang nung taila inyakertemji retire südir, ashiko pa mesüra lajibo ano tamalen inyakertem dang nungi temoatsüba ta bilema pension dena yanglua agia alitsüa akok. Iba amaji asenok aika ochimashi mapatem agi senmang küma amanga aruba atakatem rongsen agi takar küma alitsüa akok. Ashiko, item rongsentem jagi pei chinurtem nembo tangalen education tajung agüja alitsü südi. Ajisüaka, Naga nungertemi item ama ochimashi mapatemji senmang küma amshitsü mejangratsüla. Iba ochimashi senmang aruba süngzüji tokdang nung dang Nagaland azükarutsü aser shiri iba ochimashi mapatem melentepa inyaka aruba süngzüji tokdangtsüdir, parjisa temoatsüba asütsü.