Ochimashi ya tashitak ka ama yaritsü nüngdak: Tir Pranab

New Delhi, October 13 (Agencies): Ochimashi ajanga linük ka ainba nung kongshir, aser iba ya tashitak ka ama yaritsü nüngdak, ta Tir Pranab Mukherjee-i ashi.

October 26 nü nungi tenzüka Vigilance Awareness Week amungtsü lia Tir-i, “Ochimashi ajanga linük ainba nung kongshir, sorkar sen tarulen ajema kümdaktsür aser senotsü aser rongsen alemba nung timtem adoker. Iba ya terenlok lenmang nung tetsüktdaktsü tulutiba. Ochimashi indang temenentem nung awareness aser public opinion agütsütsüji kanga tongtibang,” ta ashi.

Mukherjee-i, ochimashi ya tashitak ka yariba ama yaritsüla aser ibaji nokdangtsü atema temelung agüja inyaktsüla,” ta ashi.

“Taküm küm atema Commission-i omen ‘preventive vigilance as tool of good governance’ ta shimbaji shitak shimogo. Ochimashi nokdangtsü atema agiba meratemji ajanga ochimashiba ajema akümba dang masü saka junga yimsüsüba aser ozüng amshiba nunga yaritsü,” ta Tir-i ashi.

Tatong Tir Hamid Ansari-ia, preventive vigilance ajanga ochimashi nokdangtsü, ta ashi.

“Yimsüsüba nung temerük aser level ajak nung ochimashi agientsü atema sorkar department tem, institution tem aser nübur ajaki ochimashi nokdangba meratem junga benshitsü atema awareness agütsütsü nüngdak,” ta pai ashi.

Ato kilonser Narendra Modi-ia, taküm küm vigilance week atema Central Vigilance Commission (CVC)-i “Ketdangsüba nung ochimashi nokdangba aser junga yimsüsüba nung preventive vigilance benokbaji kanga tongtibang, ibaji ajanga sangdongba nung yaritsü,” ta ashi.

Vigilance Awareness Week ayongzüker, CVC-i, sensotemi ochimashi maliba lokti ka imlaba nükjidong ataloktsütsü asoshi stakeholder ajak teyaritep nüngdaker, ta ashi.

“Yimsüsüba nung jenjang majungba kuli rongnung ochimashi ya ka lir aser junga yimsüsütsü asoshi preventive vigilance ajanga tongtibang shilem agitettsü. Junga yimsüsüba ajanga linük rongsenkettsüng jenjang ajungketba nung tongtibang shilem agir,” ta CVC-i ashi.

Preventive vigilance ya ketdangsübaren tajungba akumtsü atema meratem mesüra ochimashi agientsü nükjidong ka lir, koba ajanga jenjang tajungtiba alangzüktsü.

Department aser tentettemi October 26 nungi vigilance awareness week amungba osangji Nov. 30 nü tashi nung CVC nem agütsütsü.