Ochimashiba tenla !

Tenla kidang ochimashiba indang jembiba manganüi tulurtemi arogo nem tenla magütsü nunga koma süla (?) ta taoba hopta nung asenoki bilemdangba nung anogo ishika agiogo. Atangji, osangkaket nung adoktsüsa telangzüba aikati magütsüaka  tazüngertemi pei pei mulung nung pei pei tangatetba yari telangzüba bushir alitsü imlar. Tanü asenok tendak tongpang tulutibaji ochimashi mapatem anema raraba tongpang ya asütsü. Iba tongpang nung asenok anogo shia nokdaker aser nokdak shia laor. Ibaji asenok nisung dang asübayong lir. Nisungi yakta dang takar aser tulur kümner. Aji oda, nisungi ki tajung nung linür, süoshi tajung süboner, kiojen aika aginür, ali tuluka kanür, tanurtem kaketreju tajung nung züngdaktsüner aser arogo aser lokti nem tenla-a tulu agütsüner. Ajisüaka, item ajakji anogo shi ayangba sen taa agi matur, ita sen agia meperir aser ochishia inyakba business mapa nungi ajangzükba agi matonger. Ajisüaka, item taginüba ajakji manger sangwa nung kanür asünungji ochimashi inyaktsüsa akümer, iba jagi metetsümonga asenoki ochimashi mapa inyaka tai menar. Ajisüaka, tajung amato saka tai kaji asenoki ochimashi mapatem nungi bendenba sen Tsüngrem nem tenla agütsür. Atangji, magütsüa majung kechiyong ochimashi nungi bendenba rongsen nungji tarendak aser tetsübu aika lir. Ibaji dang masü saka arogoia asenok dang nungi tenla sen aika imlar, kechiyong arogo mapaji tululu aika, anungji sen aika nüngdaker. Aji oda, tenla kia asütsüla, tenzükertem alitsü kia yanglutsüla, mission mapaa tulu inyakner, tenla kidanga nüngdak oset tajung  yuner aser ano aiener anendak kia yanglutsüla ta arogo nüngdakjia tatem maka. Ajisüaka, arogo nung nisung ishikati ter shilem agütsüba agibo meperir aser temoatsü aser tenüngsang tenlabo nisung shingaia noklang ka dak tema magütsür, anungji ishika dang arur. Iba ama medokmeperi abensadaktsütsü asoshi tulurtem dang sen meshir. Aji oda, tulur aser takartemi tenla tulu mulungsua agütsür, anungji itemji meshiteta sarasademer amshir. Asenok ajak asoshi lendongji yangji keta lir. Aji oda, tang asenok amenba tenla ki ya ochimashiba rongsen agi yangluba teimba asütsüa akok. Mesüra ochimashiba rongsen agi ita sen kümer Tsüngrem tenzüker aika nem lokti aser kibong aikati ita sen agüja alitsüa akok. Tsüngrem tsüngdang itemji tagizüktettsü asü ta asüba tasüngdangba tulu lir. Aji oda, kija kibong asüyonga mesüra arogo asüyonga yakta meinyaki takar kümnüba agi kecha matidaki ochimashi mapa inyaker. Item tatidangtemji asenoki koktettsü asoshi tangatetba aser tamang tulu alitsü nüngdaker. Yisu anogo lir nü aser lir aonung lumier yaseta alidang, Satan-i Pa atidanga long agi amtsük kümdaktsütsüsa takoktsü lenmang ka sayubaji asenok sensak marem takar kümnüa alidang sen aika mimzüka agitsü lenmang ka sayu amai lir. Iba mapang to Yisui long agi amtsük kümdaktsür Tebu nem tenüngsang agütsür achi nunga koma süla (?) ta asenoki bilemdanga tamang aser tangatetba nung tasü itshitsü kanga nüngdaker. Tanü asenok ajak atema tongtibang kaji, telangzür kati ashiba ama, asenok arogotem ya rongsen bushiba arogo masü saka tanüla bushiba arogo asütsüla. Tanü asenok arogotemi rongsen dak ranglokba agi arogo nung tanurtem aser lanurtem asoshi temulung magütsür. Aji oda, asenoki akokba tashi rongsen bendener tanü tanur aser lanurtem asüba rogotem amentsü tenla ki sentsüpranga yanglutsür. Ajisüaka, shitakba asenoki parnok asoshi yanglutsütsüba tenla kijibo süng, long aser yin agi yangluba tenla ki masü saka parnok mulungjang aser parnok takümtemji asütsüla. Sentep sentong yabo moapu nung agiyonga kecha mali saka amangba purtem dang nüngsen aser takoksa arema ochishia alitsü asoshi sayutsüngipet sayutsüngitsüla aser ochimashiba rongsen arogo nem tenla magütsütsü tangatetba agütsütsüla. Aji oda, asenok ochimashi tongpang nung anogo shia laoaka, telao shia saker tongpang nung nokdaktetra, rara tajungji aji asütsü aser asenoki akoktsü. Idangjiang, arogo nunga ochimashi tenla arua aliba dang nungi ochishia tenlaba teimba asütsü. Idangjiang, arogo nung jangratema ken atentsü, sarasadem manentsü aser ajaki awa oa temeim mapa inyaknütsü.