Ochimashir Congress lenirtem tenüng agüjang: Congress

New Delhi, June 01 (Agencies): Congress Party-i BJP sorkar dang ochimashir Congress lenirtem tenüng sangdongang, ta ashiba den külemi Ato kilonser, Narendra Modi aser par minister temi metetsümonga judiciary alema inyaker, ta aitsü.

Congress Party otongdar, Anand Sharma-i, “Parnoki tai jenti tongloktsüogo. Ochimashi nung dena lir ta parnoki tai tongloktsüba Congress lenirtem tenüng sangdongtsü atema onoki yimjak nung iba sorkar jazüker,” ta ashi.

Sorkari ochimashirtem nem temerenshi magütsüteter ta aija Sharma-i, “Parnoki (sorkar) Chhattisgarh chief minister’er jabaso nem kechi temerenshi agütsü (?) Rajasthan chief minister anema benokba ken o tema koma asü (?) Lalit Modi anema bushisüngdangba koda odar (?) Kechiba parnoki Maharashtra nung par minister Eknath Khadse manentsü (?)” ta asüngdang.

Kaket kar prokshitsü mesüra kuli kaket yazü yanglua osangbener kar nem agüja tenüng menüktsütsü aser tai tongloktsütsü nung sorkar mongin kümogo, ta paisa aitsü.

“Ibaji Agusta Westland onük nung o atsütepdang atalokogo. Item kaket tu kechi asü (?) Kechiba parnoki Supreme Court-i ketdangsüa bushisüngdangba nung ai-aura maka (?) Parnoki iba ya anentsüla, iba ama tesempatsü tasa atongba Department ya tera alia inyaker. Iba ya Prime Minister’s office nungi inyaker,” ta Sharma-isa aitsü.