Ochimashir tushiba

Tanü asen lima menena aliba merüktettsü asoshi ‘Clean election’ nüngdakba indang ajaki kanga süoki ia jembiba mapang ya asenok ajak asoshi pei tai bushiba mapang ka südaktsütsüla. Atangji, asen lima menendaktsüba tashidaktembo asenoki putetogo aser item tashidaktem rongnung tulutibaji ochimashiba tashidak agi asen lima menendaktsüba tuluba asütsü. Iba jagi tanü asen lima nung ochishia alitsü nüngdakba indang jembir. Atangji, election agiba mapang nungi tenzüka nübortemi pei temeten ayoker, tanishirtemi nübortem tenüng nung candidate dang sen agizüka chitsür aser yimsüsürtemi nübortem temeten yoka yimsü asür. Aji oda, tanü asen aliba ki, asen mener senzüba gari, aseni chiyongba chiyongtsü aser aseni agiba süoshi ajak ochimashiba len nungi aruba rongsen ajanga angubatem lir. Itemji dang masü saka aseni Tsüngrem nem agütsüba tenlatem dena memeshiba rongsentem lir. Ibayongji, asenoki sarasadema meshitetter aser iba jagi ajungtsü amai bilemer, saka temenenji tenla sen nungji masü saka tagütsür temulungjang nung lir, anungji senji masü ochimashi agi menena aliba temulungjangjiang meshitettsüla ta tangatetba kati arutsüla. Ajisüaka, asenoki asen taküm aser asen jakla meshitettsü meranger masü saka akok tashi auyatsü aser ochimashi len nungi takar aser tulur akümtsü meranger aser item ochimashi temenentemji asenoki agütsüba tenla meshiteta sarasademba agi ajungtsü amai bilemer. Ibayongji, asenok ajaki pei temenen nembanga yur ochimashi agi akaba aser ulubatem nisungtem tenüng sanga amonger. Tanü asenoki meteta aser memeteti asen lima aser lanurtem tamajungba -tamajungba kümdaktsüba temenenji aji lir. Asenoki khen süngjemshir, tangar dak mereprangli saka asenoki asen tai aser tashimait indang bilemdangdi  süra, kodaser ochimashirtemang tushia amshiba lima aser loktiji ajungtsü? Kodaser ochimashirtemang tushia sayuba loktiliba nung ochishir lanurtem adoktsü? Kodaser ochimashirtemang tushiba yimten nung lenirtemi ochishia inyaknütsü? Aji oda, nübortem nem agütsütsüba shilem aser temoatsütem magütsüi pei asoshi dang miima rezüngdena yudenba rongsen agi manger sangwa nung kar takar akümtsü aser nübortembo jenjang tamajungi ludaktsütsü. Item takar aser tulurtemibo iba ama jenjang ka nung dang nübortem lidaktsüner, kechiyong iba ama jenjang ka nung nübortem timtema ali nung dang parnoki akhümtsübutsü aser meshimetsüi arutsü ta yimsüsürtem aser takar – tulurtem aikati bilemer. Aji oda, metsütsüi asenoki lokti sentong tulu ayongzüker aser iba ama sentong nungji ochimashi agi akaba aser ulubatem tongti tesemdanger südaktsür. Item ochimashiba purtem tongti tesemdanger jaoka yur anüng tonga tua asenoki parnok tushia amonger. Alima nung akaba tenüng tajung ajak enoka ken mejema tenloktsür aser semchirsemnurtem tashi jaaka mejamatsüsa tenüng tajung agütsür. Iba tongti tesemdangersangi asenok sen crore noklang junga miimzüka yur asenok nem asenok sen crore noklangka nung jagi sen lakh ka tenla agütsür. Asenok asoshibo sen lakh kaji aika, anungji tenük tasüng, iba tenlaji aginüba agi pa tongti tesemdanger südaktsü. Ajisüaka, pa mulungjang nungbo kanga menünüa bilemer. Iba tashiji asenoki memetet asenoksasa asenok alur aser asenok mezüngmeshidaktsür. Item tamashi shisatsü aser mapatem nungi asenok nüchi akümtsüla. Asenoki ochimashir tushiba tetezüji ochimashiba mapa inyakbaji shitaka ta agizüker. Aji oda, chirnurtem tsüngdang ochimashir tushia sayuba jagi parnoka ochimashisang amaji kümang ta ajungshiba den kasa akümer. Iba amaji kaketshirtem rongnunga tatidang nung ajizüka züluer takok angusangang tushira ochishia zülurtemi kechi bilemtsü? Iba kasaji sen agi alia tulur akümsangang asenoki lanurtem tsüngdang tushia sayura, iba jagi lanurtem mulungjang nung tangatetba tajung komaser agütsütettsü ? Iba amaji tanübo asenok ajak ya chirnurtem dang ochimashi mapa inyaktsü len sayurtemang kümogo. Alima jungnüra, iba ama ochimashir tushinüba shisatsü aser sobalibaji endoker ochishir tushiba aser ochishia alitsü merangba sobaliba ka tenzüktsüla.