Ochimashirtem aoksatsüsa mapa inyaktsüla : P.B Acharya

Kohima, November 9 (TYO): Asen loktiliba nungi ochimashi tera nungi atsüdoka endoktsü atema yimsüsür aser ketdangsertem densema ochimashirtem ajak nem ‘shock treatments’ agütsütsüla, ta Nagaland Governor, P.B Acharya-i ashi.
Tawa Mon district semdangba sülen P.B Acharya-i gari lenmang tia aser Centre-i teyari agütsüba scheme tem meta talangka pilar alilen manguba atema mepelaba olen ka ashi.
“Nagaland ya takar saka Naga nungerbo sensaker kechiyong nisung kar dang multi-multi millionaires kümogo” ta Governor-i ashi.
“Mon tashi tonga aoba gari lenmangji kangasa majung saka yimsüsür shingaia nübortem atema mapa meinyaktsü. Mon nung MLA shinga maliasü, saka Chief Minister aden asübo, MLA ajaki pa meina arula. Iba mapang MLA tem ali asübo, ni parnok dang district nung terenlok maliba atema asüngdangla” ta P.B Acharya-isa shisem.
Arrtsülen rongsenren tsütsü maparen inyaktsü atema lapokba International Trade Centre lapok saka takok monguteti lir. MLA ajaki yimtsüng ka ka ‘model village’ ama shimtsüla aser parnoki shimba yimtsüngtem renlokdaktsütsü. Yimtsüngtem senzüka yutsüra, linük-a senzükatoktsü, ta paisa shisem.
“Mid Day Meal den Central scheme aikati nübor matonger. Yimten lennirtem aser teloktemi vote angutsü atema mazüngi inyaktepba agi nübor nem welfare schemes meinyaktsür” ta P.B Acharya-isa ashi.
Nagaland Governor-i Wokha district kübok Pangti yimtsüng semdangdang, idakji government school nung anogoshia MDM magütsüba osang angashidang pa temulung raksa, ta ashi.
“Iba ama ochimashi aser inyakyim ya jungkai adoka metetdaktsütsüla aser Nagaland atema senotsü meshiba ya tiyazü lir, kechiyong terenlok mapa inyaktsü tejangraba chichiba mali aser chichiba Khristan tema nisung ishika dang lir” ta paisa tebilemba lemsatep.
Sen crore meyirjang aika arur saka state sorkar nung sentsüh aika lir aser iba jagi asenok backward sayur. MLA shia pei telongtet nung terenlok mapa inyaktsü atema küm nung sen crore kaka angur. Anungji, nübortemi parnok dang senji kechi nung amshir ta asüngdangtsüla, ta paisa ashi.
Nagaland Governor ya Nagaland University nung Chief Rector lir aser pai NU Vice Chancellor shimba indang olen ka ashidang, tetemjen Vice Chancellor ka shimtsü atema mapa inyaktsü, ajisüaka VC ji Naga nunger ka shimtsü ta asüba tebilembabo magizüker, kechiyong tetemjen nübo ang ka shimtsü, ta pai metetdaktsü.
Prime Minister Modi-i sen 500 aser 1000 note shibangtsüba atema P.B Acharya-i pa nem tenüngsang agütsü. “Iba ya ‘black money’ alirtem asoshi taoksatsüka lir. Iba ya ochimashirtem asoshi kanga dang taoksatsü aketba osang ka lir. Asenoki tebilema mebilemdangba temelenshi indang mapa ka tenzükogo” ta pai metetdaktsü.