Ochimashirtem atema nübo meyimtsütsü: RK Singh

Patna, September 30 (Agencies): Bihar assembly election atema sen yong ochimashi tarak keta alirtem nem BJP ticket agütsür ta tai tongloktsüba dak sentakba nung Bodhbar nü BJP MP, R.K. Singh-i, item ama candidate tem atema pai nübo meyimtsütsü, ta shiogo.

“Bihar assembly election atema item ama candidate tem asoshibo ni nübo meyimtsütsü, ta taoba mapang Union Home secretary aser Ara nungi Bharatiya Janata Party MP, RK Singh-i ashi.

Paisa, BJP-i ochimashi tarak keta alir candidate tem nem ticket agütsüogo saka tang teinyaktak MLA aser ochimashi tarak maketertem nem ticket magütsü, ta ashi.

Party-i iba ama ya inyakba ajanga Bihar district balala nung BJP nung inyakertem aser pusemertem jashidaktsüogo, ta pai ashi.

Taoba mapang IAS ketdangser Singh ya Rajput upper caste nungi lir aser Bihar ama kin balala nung ajemdaker toktepba state ka nung pai shilem tulu agitsü.

Tamalen R.K. Singh-i, BJP lenir kar kinüngertem aser temzüng alema aibelena alirtem nem party ticket agüja lir, ta shia liasü.

Deobar nü BJP MLA Vikram Kunwar-i, party-i taoba mapang MP Mohammad Shahabuddin kahsetsang Manoj Singh nem sen crore 2 yong ticket agütsü,” ta shiogo.

“Ni ama tang teinyaktak MLA nem ang BJP-i ticket magütsü, saka Shahabuddin kahsetsang Manoj nem sen crore 2 yong party ticket agütsüogo,” ta Raghunathpur assembly segment nungi BJP MLA-i ashi.

Ano BJP MLA aser taoba minister Chandramohan Rai-ia, party-i temzüng alema aibelena alirtem dang sen yong ticket ayoker ta party aitsüogo.

Tajangzük mebushiba tentet ka, Democratic Reforms tentet-i bushisüngdangba ajanga sayuba agi, tan Bihar Assembly election nung tokteptsüpur candidate rongnung aibelen ken o alir candidate 99 lir.

BJP-i toktepdaktsür candidate rongnung ken o tamajung alir candidate 47 tashi lir.

Taruba Bihar Assembly election October 12 nungi tenzüka agitsü.