Ochimashirtem merenshir

Alima nung ochimashi mapa inyakertem kanga lir, ibayongji item ochimashi mapa nokdangtsü asoshi yimteni telok tapu balala tenteta inyaker. Ajisüaka, ochimashirtem anema inyaktsübaji mapa temela masü, ibayongji tesem aika nung ochimashi anema inyakba mapa nung takok menguteter. Kari ochimashi inyakertemji tsübur kechiyong parnokji nisung tamajung, anungji tetsübutsüka, karbo ochimashi inyakertem nem mesüzükdaktsür, anungji ochimashi mapa inyakertemji mepushir aser pushiyonga kecha tai meinyak ama ken o tembangtsür aser ano karibo tebushia mebushii odang amadokdaktsür. Ajisüaka, tang India nung nakmati (coal) atuba maparen nung 2014 küm supreme court-i 1993 küm nungi nakmati atutsü aoshi government-i company balala nem tesem lemzüktsüba mapa ajakji meshitak aser ozüng anema inyakba mapa lir ta metetdaktsüba dak ajemdaker aibelena alirtem nem temerenshi agütsüba mapa jagi ochimashi mapatem anema karibo temulung agüja inyakdagi ta sayuogo. Ibaji linük asoshi osang tajung ka lir. Alima asünungji tamajunger alitsübasa, anungji ochimashirtema alitsübasa. Laishiba nunga Apijemtsü Shin nung “nisung tamajungertemji tamajung anogotem asoshi yanglu,” ta shia angutsü. Aji oda, tamajung anogotem asoshi yangluba nisung tamajunger aser ochimashirtemjiang temeimtsüka bilemer. Ajisüaka, yimteni nisung tamajungertemji mazüokra aser oshimashirtem bushia memerenshira, lia liabo alima nung ochishir dang nungibo ochimashir teimba akümtsü aser nisung tajungertem dang nungibo tamajunger teimba akümtsü. Tanü Nagaland nung kasa tiaji atalokba angur. Ochimashi tilaka inyakdang mebushi aser memerenshi toktsü nungji, joko, office ajak nung küm shia ochimashi mapa tuluba – tuluba inyaker. Nagaland nungsa ochimashi mapa teinyakba saka Nagaland nung ochimashi mapa inyakba tai ajanga tepuodaki aiba otsübo mangashi. Ashiko, Khristan-tem dang asüba agi külemi lemsaa agir taidoker yutsür südi. Iba jagi Nagaland tekongraba – tekongraba kümer tangbo Naga nunger kechi yimsü amanger memetet aser mejangja ka kümogo. Tangarbo, 2014 küm Supreme court tashi nung ochimashiba ken o benoka jembir küen obendang agütsüba nung ajemdaker tang Coal ministry nung inyakertem rongnung mapa nungi anener alir dena tepuokdak ayutsü obendang agütsüogo. Item rongnungji Coal Ministry nung taoba secretary H.C.Gupta dena lir. Pa ya nakmati atutsü tesem alemtsüba maparen asoshi shimtetba Screening Committee nung mendenbuba liasü. Iba committee yagi supreme court-i manendaktsü tashi inyakyim kecha lateta mayu ser parnok sünütsü süa inyaka ooya liasü. Iba mapang parnoki mulungba company nem nakmati atutsü tesem lemzüktsüba maparen tang Gupta den Coal minister nung inyaker ketdangser ana dena aija lir. Atangji, tamalena kasa ken o ya okadak jembi saka iba mapangbo government tenzükertem dak mekongshii private company nung inyakertem kar dang aitsür anen. Ajisüaka, tang tesüsa ministry nung retire ser aliba secretary tashi tepuokdak ayutsüsa obendang agütsüba jagi linük nung ochimashi mapa anema inyakba nung takok ngua odagi ta sayur. Ministry mesüra department ka nung secretary-ji atamata masü. Pa mesüra laji department nung tekolak aser government nung shiba minister südir pa mesüra la Advisor amai lir. Yimya agi, ministry mesüra department inyakyim ajakbo minister-i memeteter, anungji kodangsa nübortem asoshi sentong (policy) kar yanglutsü südir, secretary-i dang shisalen teyur. Aji oda, kodang government nung Secretary ka ochishia lidir inyakyim ajak ochishia akümer. Ashiko, ochishir Secretary-bo ochimashir minister-i meyunütsüa akok, ibayongji aiben government nung secretary-tem melenpet melena angutsü. Ajisüaka, government nung minister o Secretary na longjemer ochimashi mapa inyak nungbo alima agi matitsü aser nübortem asoshibo ibaji alima tatembang amai asütsü. Iba amaji matalokdaktsütsü atema nübortemi teti ochimashi mapatem anema kanga sashia nokdaktsüla.