Ochimeshii agiba sen meyiptsüogo

Dimapur, Mongputeni/October 09 (TYO): August 14 nü osangkaket balala nung Legal Metrology & Consumer Protection Department nung aibelena aliba koba adokogo iba ken o dak sendakba osang maneni lemsateper, ta Bodhbarnü RTI activists- Odi Jamir aser S. T. Yapang Lkr nati sangdong ka nung metetdaktsü.
“School 100 nung Consumer Club tenzüktsü asoshi 2011, March 7 nü sen lakh 10 agizük, saka school 35 nem merirjang terter agütsür liasü nungji tanüngba school 65 nem sen lakh trok sür merirjang tenem (6,50,000) iba küm mademdangsa ajak agütsütsü aser beneficiary list onok ket nunga tongtsütsü,” ta sangdong nung shia lir.
“2012 küm June 6 nü Thermometer Verification Kit 5 aliba ama sayua liasü, ajisüaka Department-i ana dang sayutet. Tang tanüngba asemji sen 9,62,789 agi order süogo, aser memenui arua atongtsü. Maneni Calibration Tower ana yanglutsü asoshi Ashlin Enterprises telok Pune nungi parnok nem sen 26,92,300 (lakh metsür trok merirjang tukor ana sür noklang asem) agütsü, ajisüaka ka dang yanglur 2012 küm May 10 nü sen ajak agütsür yok nungji Calibration Tower ka indang sen lakh 14 meyiptsüogo, ajisüaka iba sen jagi Calibration Tower yanglutsüji tamakoktsü,” ta sangdong nung shia lir.
“Coin Operated Person Weighing Machine 12/04/12 anogo nung sen lakh 20 agi aliba nung temulung melemi liasü, ajisüaka menur asüyonga beneficiary list bener arutet nungji yangji temulung asür,” ta tenatisa metetdaktsü.
“Tekalen shia alibatem asoshi samaa aliba sen ajak lakh metsür toku merijang neter ana noklang tenet sür tir tuko (29,72,789) meyiptsüogo. Sama aliba sen ajak nisung kati dang menokba asoshi temulung shiranga bilemer. Senior officers aser külem staff ajak meji shibai sen ajak menokogo, Tsüngremi na moajang aser Naga lima tasenba nung ner semchirsemnur kecha tarak meketi yimsü süa, arshia liadakjangma,” ta kasa sangdong ajanga metetdaktsü.