Ochishia inyaktsü nangzükdi

Linük nung yimten yimsüsürtemi anir küm shia ‘ Vigilance Awareness Week’ amonger aser taküm 2018 küm asoshia iba sentong October 29 nungi November 3 tashi amongtsü tenzükogo. Taküm iba hoptamong omenji ‘ Ochimashi mapatem samajang : India tasen ka yangluang’ ta shimteta lir. Iba omen nungji ajemdaker Nagaland nunga tesem ajaklen yimten nung yimsüsür aser tulurtemi anir amongtsü tenzükogo. Iba hoptamong nükjidong ya nübortem nem ochimashi mapatem anema teti mita alitsü aser nokdaktsü asoshi tangatetba agütsütsü aser yimten yimsüsür aser government nung inyakertema pei mapa nung ochishia inyaktsü asoshi bendanga agütsüshitsü asoshi lir. Ibai arogo nung küm shia asentenshi sentong ayongzüka amongba amato lir. Atangji, alima asünungji tang CBI nung ataloba ama Vigilance  nung inyakertem daka dena temulung malemtsüsa ataloker. Aji oda, karibo ochimashi mapatem anema ochimashi inyaker, iba jagi asentenshi mapang küm shia agiaka ochimashi anema raraba tongpang nung melamelaa laoadoker. Ajisüaka, nisung shiai pei mapa nung akok tashi ochishia inyaktsü merangtsübaji kanga tongtibang lir. Ochimashirtemsa asüyonga ochishia alitsü merangertem o kenyongi ochishia alitsü tebilema mebilemi sademsadema ochimashi mapa inyakertem na tetsüngdaji kenyongi talangka ittepa lir. Ochishia alitsü merangertemi mapai mao mesüra mapa meinyak angati sen magitsü, ochishia alitsü merangertemi mapa mayoktsü aser malitsü, ochishia alitsü merangertemi tangar tenüng nung sen agizüka mechitsütsü, ochishia alirtemi ochimashi mapa anema inyakba manentsü aser ochishia alitsü merangertemi akok tashi mapa shitak aser junga inyaktsütsü merangtsü. Iba amaji ochishia alitsü aser inyaktsü meranger külena, ashiko, aikati shitak meinyaktettsüa akok. Ajisüaka, kodang ochishia alitsübo tebilema mebilemi kodaser tajangzük tuluba angutsü ta dang bilema inyakdir, kecha agia tenük masüngtsü, anungji tanguba ajunga semnütsü aser aginütsü. Tanü Nagaland nung mapa kata shitak meinyaktet aser merenemtet timtemba ya asenoki ochishia alitsü asoshi temeranga memerangdangba tamaitsü lir. Aji oda, tanü ama ochimashi mapatem anema mittsü aser raratsü asoshi tangatetba agütsüba den külemi ochishia alitsü aser inyaktsü asoshi nangzükba sentong ya Nagaland asoshi kanga tapet hopta sentong ka asütsü. Shiranger asoshiang mozü nüngdakba ama ochimashirtem asoshiang ochishia alitsü ajungshitepba aser nangzüktepba sentong ya nüngdaker. Iba ama ochishia alitsü nangzüktepba sülena, ano ochimashiba inyaka angutsüa akok, saka senso ajaki tezü medangi ochimashi mapatem anema ola adoktsüla. Ochimashi alidaksa asüyonga kibur mali ama ola madoki auyadaktsüba o kiburi meteta auyaba na tetsüngda talangka alitsü. Alima asünungji ajaklen ochimashir lir, saka tangar lima o asen lima na tetsüngdaji tangaribo ochimashi mapatem anema mita anidaker aser ola adoker saka asenokibo temita memeiter aser olaa madoker, iba jagi tangar lima nungbo kasa sentong aser kasa sen agi yangluba mapatem topur junga renemtetter aser nübortem anisüngzüker saka asen lima nungbo shibai ochimashi meinyaklir pajiang takoksa ta asüba tangatetba nung asenok alir, iba jagi asen lima agi asenok nümamedangtettsüsa kümogo. Asenok ajak longjemer akok tashi ochishia asen lima tasen küma yanglutsü melen, tangbo asenok ajak longjemer akok tashi ochimashi mapa inyaktsü tokteper ama inyaker. Ochimashiba len nungi mapa mengura aser takar mekümra asenoki asenoksasa mapa makok tagidak makaba nisung amato bilemer. Iba ama mashilen angatetba shisatsü aser mapa agi asenoki asen lima kanga mejungi raksaogo. Asen ki topur ajungbaji masü mesüra asen kija akabaji masü saka asen lima topur ajungtsüla aser asen nübortem akatsüla. Iba tangatetba nung asenok ajak ano khen ochishia alitsü bendanga agütsüshidi.