Ochitashiba

Tanü putu tensa nung alirtem asoshi tajung kaji computer inyakyim ajanga asenok ochishia lidaktsütsü merangba ya asütsü. Atangji, asenok aikati timtem marem mesüra takar kümnü marem ochimashi mapa inyaker. Ano, nisung karibo ochishia linüyonga akhidang nungi benshia aruba ochimashi mapatem ajanga ochishia melitetter. Item rongnung electoral roll nung nisung tenüng talila züluoka aliba, government office-tem nung inyakertem tenüng tiyazü talila züluoka yur ita sen agizükba, ano nisung karbo department balala nung külemi ita sen achiba aser tiyazü tenüng meyirijang dak tali züludener item tenüng nung teyari agizüka agiba mapatem ya akhidang nungi ochimashi mapa ser nung ochishia inyaker ama inyakyonga aruba mapatem lir. Atangji, mangatet kaji, item ama ochimashi mapatem ya arogoia inyaker. Ashiko, tiyazü mapa inyakba tenüng nung bill yanglur agizükba agi tenla ki yanglua alitsüa akok mesüra tenla kidang tzü tank amendakbajibo tiyazü tenüng amshia inyakba mapa ka asütsüa akok. Item amaji asenok kija aser lokti maparen aika nung asenoki meteta aser memeteti ochimashi mapa inyaker. Ibayongji, senbo endoker saka alima merenloker aser sensakertem jenjang kecha balaka tajungba makümer. Item ochimashi mapatemji kümsa küm nisungang melentepa inyaker arur. Tetezü, ochimashi mapa inyaktsüba ya asenok senmang ama kümogo. Ajisüaka, tang aser tarutsü atema osang tajung kaji, asenoki ochimashi mapa inyaknüyonga meinyaknüyonga meinyaktettsüsa mapang ka agi asenok menepa arudagi. Joko, department aika nung government-i teyari agütsütsüba senotsüji department nung tongti ketdangsertem nem masü saka teyari angutsüba nisung nem dang pa mesüra la indang bank account ajanga dang agütsür, iba jagi nisung ka tenüng nung tangar kati magizüktetter. Item ajakji tanü putu nung computer inyakyim ajanga asenok ochishia lidaktsütsüsa azüokba mapatem lir. Ano, asenok ochishia alitsüsa akümtsüba tesem kaji electoral roll ya asütsü. Joko, Election Commission-i aginüba ama electoral roll nung nisung ajak pei tenüng shitak khen dang alitsüsa pei pei Aadhaar number ajanga dang pei tenüng züluoktsü. Tang yabo kiburi meteta aser memeteti nisung ka tenüng tesem asem pezü tashi nung lir. Iba jagi balaka, Nagaland nung nütsüngyongsük den mesütep electoral roll nung voter tenüngtem lir. Ajisüaka, kodang Election Commisson-i asüngdangba ama, electoral roll nung tenüng züluoktsü asoshi Aadhaar number amshitsü atema Law Ministry-i meladir, idangjibo electoral roll nung tenüng tasen züluokertem dang masü saka tang züluoka alirtem dena pei pei Aadhaar number den sentaktepdaktsütsü. Asenoki Aadhhaar number mamshii electoral mapa inyaktsü asoshi kuli aika ashitsüa akok, saka tanü putu nung Aadhaar number ya mepaidoktetba nüngdak ka kümogo. Atangji, Aadhaar number amshiba ya Laishiba nung shina aliba züngdangba 666 bo masütsüa akok, saka iba aadhaar number melira tanga bank account melapoktetter, admission magitetter aser alitsü aser ayoktsüba maparen aika nung mesademi akümer. Iba ama putu tajung kati asenok menepa arudang, asenok ochimashiba mapatem ajak jungkai adoktsü aser ochishia alitsüsa akümtsü. Iba amaji ochitashiba alitsüba mapang ka tenzükdang, asenokbo ochishia aliba agi tebok mesüngtettsüsa kümra aser ochishia aliba agi tangar memenep aser takok mengutettsüsa kümra, Tsüngrem aser alima tsüngdang asenok taaktsüka asütsü. Ochishia alitsüba ya jangratemtsüka aser idangji dang asenok tesünep nung putepa litettsü. Ochishia alir asünungji nübo ishika agi aika mesayutettsü aser mali ser nung lir ama aser meinyak ser nung inyaker ama mesayutettsü. Atangji, ozüngi agi masü aser computer ajanga masü saka asenok tangatetba agi asenoksasa asenok ochishia alitsü merangdangbasa tajungba asütsü. Kobateka ochimashi mapa ajemdir, patekaji asenok rongnung meputep aser timtem agütsüba mapatema ajemadoktsü. Ibajiang asenok asoshibo nüchiso angu tenzüker asütsü.