Oct 12 nü Sonia Gandhi-i tir menden toktsütsü akok

New Delhi, June 6 (Agencies): Taküm October 15 nü Congress indang internal elections agidang Sonia Gandhi-i Rahul Gandhi nem lenmang lapokja tir menden toktsütsü akok.
Mongulbarnü Congress Working Committee (CWC)-i internal elections agitsü sentong mulunga agizük aser ibaji October 15 tashi nung tembangtsü.
Tanü CWC senden nung o jembidang, Sonia-i party züngsemtem dang telok tashi itdaktsütsü aser temulung agüja tekaratiba nung organisational elections agitsü atema ayongzük.
“Asenoki asen telok tashi itshidaktsütsüla. Tang tagidak organisational elections ya tekaratiba nung aser nendaka agitsüla” ta laisa ashi.
Senden nung Rahul Gandhi tir menden nung ajungkettsü atema jembi asü mejembi ta osangbenertemi asüngdangdang, Congress lennir tejen Ghulam Nabi Azad-i mejembi ta langzü.
“CWC-i organisational elections agitsü mapang mulunga agizükogo” ta Azad-isa ashi.
Yaküm November ita CWC züngsemtemi Rahul tir menden nung ajungketnür ta tebilemba metetdakja liasü.
November 7 senden nung taoba prime minister Manmohan Singh aser lennir tejen A K Antony nati anir züngsemtemi Rahul nem Congress tir inyakdaktsüba tebilemba lemsatep.
Tang teinyakdak Congress tir Sonia-i küm 130 tain yimtenren telok nung otsü tasen ka yangluogo aser ibaji küm 20 jungnüa tir mapa inyakba indang lir. 1998 küm CWC-i Sitaram Kesri tir menden nungi agienba sülen Sonia-i iba menden melenzüka liasü.
January 2013 nung Congress senden ka Jaipur nung alidang Rahul Gandhi tatong tir inyaktsü shim.