Oct 23 nü Interlocutor R.N. Ravi pelaa agizüktsü

Dimapur, October 21 (TYO): NTC den ENPO, NGBF, CNTC aser tanga civil society teloktemi October 23, 2017 nü Dimapur Airport nung R.N. Ravi atema Public Reception ayongzüker.
Naga talks atema Interlocutor, R.N Ravi-i NNPGs Working Committee den olemteptsü atema Dimapur semdangtsü sentong lir, ta Public Reception Committee, Member Secretary, Akhum Ayimg aser Convenor, Theja Therieh nati sangdong ka nung metetdaktsü.
India sorkari Naga yimten tebilemtsü angatetteptsü aser telemtetba ka agitsü atema NNPGs Working Committee den yimten olemtep alitsü jaokba atema kanga pelar. Iba inyakyim ya ajanga yimjung olemtep jenjang tajungba akümtsü aser Naga lima nung yimjung bener arutsü imlar, ta sangdong nungsa metetdaktsü.
October 23, 2017 anüngdang 12:30 ako nung public aser sendaka alirtem ajak Dimapur airport nung adenshir R.N Ravi pelaa agizüktsü ayongzüker, ta Reception Committee-isa ashi.
Dimapur airport nung R.N Ravi pelaa agizükba sülen civil society teloktemi Rhododendron Hall, Police Officer’s Mess, Chumoukedima nung pa den senden ka amentsü.
Maneni, Interlocutor R.N Ravi-i Chumoukedima leni atudang NH-29 anasa aliba village council temi pei pei züngsemtem anidener lenmang nung pa pela agizüktsü mepishia metetdaktsür, ta Public Reception Committee-isa metetdaktsü.
Iba sentong takok ngua agitettsü atema Nagaland nung aliba arogotemi October 22, Deobarnü sarasademtsütsü aser ano public dang-a iba osang metetdaktsütsü mepishir, ta parnokisa shisem.