Oct 23 nü Nagaland Choir Olympics grand finale agitsü

Kohima, Mongputeni/October 11 (TYO): Task Force for Music and Arts (TaFMA), Government of Nagaland-i ayongzükba “Nagaland Choir Olympics” grand finale sentong October 23, 2019 nikongdang 5:00 ako nungi tenzüka RCEMPA, Jotsoma nung agitsü, ta ketdangsertem osang ka ajanga metetdaktsü.
Iba sentong atema TaFMA-i district ajak nung event partners den senteper auditions bo agiadokogo aser district auditions nung district shia nungi choir tajungtiba kaka shima Choir 10 shimogo.
Grand Finale nung round ana agitsü aser round shia nung choir temi ken kaka atentsü. Iba tetoktepba nung tongti tetendangerji Shillong nungi Aroha Choir Director, Pauline Warjri asütsü.
Iba tetoktepba nung Choir tajungtiba nem senpet lakh 1 agütsütsü; First & Second runner nem senpet 50,000 aser 25,000 agütsütsü.
Ano Nagaland nungi choir ka shimtsü atema October 24, 2019 nü shilem agir choir 10 prongla atema audition agitsü, aser sangküm Belgium linük nung ayongzükba World Choir Games nung shilem agidaktsütsü atema maparen inyaktsü.
Iba sentong ya Musicians Guild, Nagaland-i ketdangser.
TaFMA Advisor, Theja Meru-i, “Choral music ya asen shi-azü nung keta lir aser senmang ka lir. Temaba jenjang nung choral music ajungkettsütsü atema iba sentong ayongzüker. Iba sentong agiba ajanga asen lima nung kentenertemi tarutsü nung linük aser International sabang tashi nung shilem agitettsü imlar,” ta metetdaktsü.

Grand Finale nung shilem agitsüpur:
Mon : Mon Chamber Choir
Dimapur : Cantamus Choir
Longleng : Orangkong Choir
Wokha : Bridge of the Gap Chamber Choir
Mokokchung : Ongmesang
Zunheboto : ZTSBC Youth Choir
Peren : Cantamus Choir
Kohima : Harmonic Voices
Tuensang : Yimchunger Baptist Church Choir
Phek : The Canticles