October 1 nungi MDM shitak agüjang, ajimesüra okadak nokdaktsüsa akümtsü

-S. T. Yapang Lkr., Kohima.

Education Department kübok center-i nükjidong tajung yur tanurtem nem anüngdang chiyungtsü agütsür, ajisüaka Nagalima nung mangatetba ajanga hopta piyong chiyungtsü ajak senteper hapta nung khen mesüra anaben tebok sünga chiyungdaktsür, tanüngba anogotem tebok tazüng yutsür; koba ajanga tanurtem temang raksatsür, ya asen nübur, tesayur, school ketdangsürtem, Village/Ward Education Committee azümesenba den mangatetba ajanga lir.
FAA & Director School Education Department, Govt. of Nagaland ajanga RTI telangzüba NO.ED/RTI-B/2014-15 Dated, Kohima 14/03/16 nung “Mid Day Meal ya anogo shia agütsütsü tim, ibaji Primary level tanur shia nem 450 calories den 12 gm protein agütsütsüla aser Upper Primary School tanur shia nem 700 calories den 20 gm protein agütsütsüla” “Koda masüba maparen ajanga MDM chiyungtsü magütsütetra tanur shia nem state government ajanga teyari (allowance) taruba ita 15 tashi nung agütsütsü MDM tetuyuba (guideline) nung shia lir.” ta langzüa lir. Ajisüaka sorkar nükjidong tajung ajakji asen lima nungbo amajok dang akümer.
Iba MDM keno first appeal züluba nung metembangteti Second Appeal zülua State Information Commission ajanga 2016, June 14 anogo par okadaki jaoka jembi aser iba telangzüba aginüba ama Education Department PIO ajanga 28 July 2016 nung agütsü. Iba RTI telangzüba NO.ED/RTI-B/2014-2015 nung Mokokchung district SDEO asempronglai 2011-2012 nungi 2014-2015 küm tashi küm shia anogo 220 ben tashi chiyungdaktsüba kuli agütsüa lir, aji school-i aoba anogo shia chiyungdaktsüba lir, saka yamaji school ka nung danga chiyungdaktsüa mali, Mokokchung District kübok School kar nung anogoshia chiyungdaktsür sürnung ni osang tai sangdonger süra nenoki ni anema okadaki keno abentsü ni ajungshir.
Mokokchung, Changtongya, Mangkolemba SDEO asempronglai chiyungdaktsüba osang tai agütsüaka Mokokchung district nem MDM asoshi yokba jangotsü aser senotsü school-tem nem shitak lemtsüa lir asünungji tanurtem nem MDM shitak magütsüba asoshi SDEO asem nem tai tongloktsütsüsa khuli mengutet.
Iba MDM nung timtem ajuruba tulutibaji sen menur aruba ajanga school-tem timtemer asünungji ibai state-i menur agütsür asü center nungi menur yoker? Itemji bushisüngdangtsü state sorkari mulungtet telok ACAUT amala telok ka nem nongloktsür bushisüngdangdaktsü nung kanga jungla. Ano tanurtem asoshi aruba central aser state scheme kechisa lir itemji meteta aser takok ngua bener aotsü asoshi VEC/WEC ya angati nübutok den khuret ulura asünungji yangi tazünger temetetertem shimoka inyakdaktsütsü junger.
Tang kechi tesüiar aji süiogo, saka taküm October 1, 2016 nungi Mokokchung district kübok Govt. school ajak nung MDM shitak agütsütsüla. Tanurtemi pei school nung MDM koma agütsür züludena ayutsüla, MDM shitak magütsüra onok dangi osang yokdaktsünür. Temulunger tanurtem anir arua okadak kuli agütsüdaktsütsü, tasü tait tanur shibai ochimashiba anema tasüita noktakdir pa/la azüngba tepiyong RTI Nagaland Social Media Group ajanga akokba tashi yariteptsü.
Taruba küm tatemlen 2016 October ka nungi 2017 September 30 tashi Mokokchung District kübok school ajak nung MDM agütsüba kuli RTI ajanga meshitsü, anungji school aser ketdangsür ajaki tanurtem chiyungdaktsüba den chiyungtsü koma aser nisung kwi chiyung ajakji kanga junga züludena atatsü jilia osang metetdaktsür, tamakoker ketdangsür mesüra school-tem okadak arua nokdakdaktsütsü.
Tekalen shia aliba MDM asoshi Mokokchung district nem 2011-2012 küm sen lakh 216.22 den Jang 583.36 metric tons, 2012-2013 küm sen lakh 236.65 den jang 510.31 metric tons, 2013-2014 küm sen 226.74 lakh den jang 563.21 metric tons, 2014-2015 küm sen 51.26 lakh den jang 393.07 metric tons nungi school shia koma ngua lir, item osangji aginüra kecha taa magii ner yim tonga yoktsü, yangji meperiba osangtem mesüra mashi Department ka nungi osangtsüsang aginüra meshisemer yoktsü. Item osang ya yim ka nungi lanur ter sür tema tenüng nung meshira agütsütsü. Taginürtemi 9856714829 / 9612800973 nung tongteprateptsü mesüra facebook page RTI Nagaland nungia angutsü www.facebook.com/groups/RTINagaland
Temetettsüji item senotsü, osettsüset lemyalemkuba ajak shitak bushia meyipa memeshi mesüra telung nung angatettepa jembir tembangtsüba pur denbo meyariteptettsü aser osangtsüsanga meyoktettsü.
Tesüsa tanurtem nem pre-matric scholarship agütsüba nung SBI dak alaka tanga Bank A/C No agütsürbo tang tashi mangur asünungji iba ita tatem tashi nung magütsüra RTI Nagaland Social Media Group ajanga iba khuret tongzüka okdak PIL benoktsü mesüra RTI ajanga kuli tejangja bushitsü. Kechiyong ibai Bank kari parnok dang amshidaktsütsüba sentong nung ketdangsür nem sübokrem agütsür tanga bank A/C amshir nem sen magütsüi talangka sota ayur ta temulung malemtsüsa kümogo. Ajaki metettsüji Nationalist Bank rongnung tamajungtibaji SBI ya lir, ibaji kechiba? Ni mapang tajung nung lemsateptsü.