October 10 nungi raliwalirtem atema J&K lapoktsütsü: Satya Pal Malik

Srinagar, October 07 (Agencies): Jammu & Kashmir tensa süngjema kümdar, ta shia Angh, Satya Pal Malik-i, October 10 (Brihostibar) nungi tenzüka Jammu & Kashmir semdangtsü atema raliwalirtem nem temelaba agütsütsü, ta metetdaktsü.
Ita ana tejaklen Malik-i advisors aser chief secretary den security senden ka amenba sülen raliwalirtem dang Jammu & Kashmir toktsür aotsü tuyua liasü.
Jammu & Kashmir sorkari, “Angh Satya Pal Malik-i Home Department’s advisory nung ajemdaker raliwalirtem dang Kashmir toktsür aotsü tuyua liasü. Ajisüaka 10.10.2019 nungi raliwalirtemi state semdangtettsü,” ta metetdaktsü.
Taküm August ita nung Centre-i Amarnath yatra thinenba den külemi kiralongra amokmeren nung ajemdaker temeshi aini aor aser raliwalirtem dang Kashmir toktsür aotsü tuyua liasü.
Kashmir nung security review senden ka amenba mapang nung Angh Malik-i iba tenokdangba agientsü lemtet. Iba senden ya Malik leniba nung amen aser senden nung Planning and Housing & Urban Development Department nungi Principal Secretaries-a aden.
Taoba hopta Centre sorkari, Jammu & Kashmir nung October 24 nü Block Development Council (BDC) elections agitsü ta sangdongogo aser ibaji ajanga Kashmir nung tensa süngjemba temaitsü sayur.