October 2 nungi Indian Railways-i single-use plastic nokdanger

New Delhi, September 25 (Agencies): Linük nung transport tulutiba, Indian Railways-i October 2 nungi tenzüka train aser railway station nung single-use plastic nokdangtsü atema telemtetba agiogo.
Principal Executive Director, Environment, Ministry of Railways, Alok Kumar Tewari-i iba dak sendakba shidi General Managers, Zonal Railways, PUs, IRCTC, KRCL, DG, RDSO, NAIR, CAO, DMW, RWP nem agütsüogo.
Ministry of Forest and Environment and Climate Change-i India sorkar departments/ministries ajak dang single-use plastic nokdangtsü atema tuyuba nung ajemdaker Indian Railways-i iba telemtetba agiogo, ta shidi nungji shia lir.
Kasa shidi nung sorkar departments aser ministries dang plastic carry bags, plastic cups, glasses, bowls, forks aser spoons densema chiyungtsü aser tajemtsü amshiba single-use plastic- plastic items/disposable plastic nokdangtsü tuyua liasü.
Kasa shidi ajangsa private sector danga single-use plastic mamshitsü ajungshia lir.
Iba tenokdangba ya Mahatma Gandhi asoba anogomong October 2 nungi tenzüktsü. Tawa Parliament telongtet nunga single-use plastic nokdangogo.
Mezüngbuba shilem nung Railway Board-i ketdangsertem dang tongtibang railway station 360 nung plastic bottle raksar indokba machine 1,853 amenoktsü tuyuogo.
Board-isa Indian Railways Catering and Tourism Development Corporation (IRCTC) dang plastic bottle temji meyipa agütsütsü tuyu. Board-i Zonal Railways nung General Managers danga railway station nung yokyayokchirtem dang plastic carry bags mamshitsü atema tuyutsü metetdaktsü.
Taküm Independence Day anogomong sentong nung jembidang Ato kilonser, Narendra Modi-i nüburtem dang single-use plastic mamshitsü ayongzüka liasü.