October 2 tashi nungbo Assam temerüktiba state kümdaktsütsü Sonowal nükjidong lir

Guwahati, February 20 (Agencies): Haryana, Himachal Pradesh aser Punjab nung metsümeshidak (toilet) maliba Maulvis aser Muftis nunger kidang sati kuli magütsütsü telemtetba agiogo.
State asem nung Muslim nunger kibong akumer shia atema teinyaktsü telatetbatem rongnung metsümeshidak yanglutsü densema lir, aser ibaji tanüngba state tem nunga benshitsü, ta Jamiat Ulama-i-Hind nung tongti tezülur Maulana Mahmood A Madani-i ashi.
“Himachal Pradesh, Punjab aser Haryana nung Maulvis aser muftis nunger kibongtem nung metsümeshidak melira kibong kümba sentong magitsütsü telemtetba agiogo,” ta pai ashi.
Taoba mapang Rajya Sabha MP Madani-i taoba hopta Khanapara nung Assam Conference on Sanitation (ASCOSAN) 2017 senden lapoktsüba sentong nung pai iba onük benoka jembi. “Linük ajunga nung tamangba yimsü lenirtemi metsümeshiba maliba kidang sati kuli magütsütsü telemtetba agitsüla,” ta pai ashi.
Iba senden nung Assam Chief Minister Sarbananda Sonowal-i o jembiba mapang nunga pai iba onük nung kanga tongtibang süa jembi.
Assam aser nübortem Swachh Assamtakok angutsü asoshi bendanga agütsüba sayutsüba nükjidong nung Assam otsü nung tulutiba senden, ASCOSAN-2017 Assam yimtiba nung ayonga among.
Prime Minister Narendra Modi October 2 2019 tashi nung ‘Clean India’ nükjidong matalokdang küm ana jilia October 2, 2017 tashi nungbo Assam merüka kümdaktsütsü Sonowal nükjidong lir.