Odang yutsüba taa

Kecha masüar, tangaria inyaker nung, odang tokjang, odang agiang aser odang inyakang, kecha masü, yamaji ajaki inyaker ta tai agi shitak küma inyakba Nagaland nung, shitak kata mali nisungtem timtem tenzükogo. Mapa meinyak ser sen agizüka agibaji asen dang masü saka ajaki agir ta bilema ajaki inyakba agi senbo ajak agima saka mapa inyakba temongbo tilakata mali ta Nagaland nungbo government-a mali amato kümdagi. Aji oda, asenok rongnung mapa tajung masü saka tamajung ajizüktepa inyaktsü jangraba ajanga tanübo asen lima tereprangtsü nunga tajung tilakata mangur. Tanga lima nungi tayimtsü nung arua Nagaland atongdang, Nagaland nung tayimtsü anendakjibo arem süngo aser azü tu agi meyipanger angur. Aji oda, Nagaland nungbo tayimtsü anendaka anepalurtemia, ashiko, odang tokjang Nagaland nungbo kiojen aser kima yimdong topur junga inyaktsü nüngdak madoker, kechiyong belema inyakbaji dang amajok asütsü ta bilemer südi. Tangalen nungi train nung Nagaland-i arudanga, train station nung tezüknem aser kima auyi mesüra motzü agi sünga angutsü. Aji oda, Railway nung inyakertemia Nagaland nungbo mapa shitak meinyakyonga kecha masü, shingaia mebushitsü ta bilemer alitsü. Tangalen nungi bus nung arua atongdang lenmang majungba agi timtembabo amadoker, bus station memerükba aser anepalu masüba angudang Nagaland nung yabo kibur maliana ta bilemtsüsa tezüdangtsüka angur. Ashiko, Naga nunger asoshibo tayimtsü anendak topur junga mayuyonga, train station merüka mayuyonga aser bus anendak anepalu masüyonga, pei jurila meyong alima rongsen aika kara ojang ta bilemba shisatsü alitsü südi. Iba jagi yimkong jajaba lenmang majungyonga ojang, yimkong atema lapokba mozü ki aser kaketreju majungyonga kecha masü ta Naga nunger tuluba nungi tilaba tashi agi bilemer asütsü. Naga nungertem ya pei lima ajungtsü asoshi bilemer masü saka ajak sen bushir dang aküm südi ta bilemer. Atangji, Naga nungertema karbo tangar adoksaa akaba purtem alitsü, ajisüaka parnok akaba jagi Naga lima topur ajungtsüsa meinyakra, parnok akabaji amajok asütsü. Aji oda, takartemibo lenmang tamajung nung jaja aremer, nübortem tangutsü tim mangu timtemyonga takartem asoshibo kecha balaka masü. Ibaji tsüngsem asemsangiang tetsüng nung tsüngsem agi timtem agütsüba metet ta ashiba den kasa lir. Aji oda, lenmang junga meyangluyonga teraka inyaker sen agizükang ta ajungshitepba agi tanübo National Hihway dena asenoksasa yanglutsüsa kümogo. Iba kasaji government nungi aruba sen temalen tulurtemi agizüka agir tera agi nübortem ket atonger, ajisüaka ano sen teraka jagia yimkong asoshi terenlok mapa tajung ka inyaker masü saka terara lema agir, iba jagi nisung shinga majangzüker. Ashiko, ibajia kecha masü, yim ajak nung yamaji dang lema agir aser paper nung dang mapa inyakba amato sayur ta bilemba agi asütsüa akok. Aji oda, kecha masü, ajaki agir, ajaki bener aor, kecha masü, shibabo ochishir ali ta jembia-jembia ajak ochimashir akümba ajanga tanü mozü kidang mozü mangur, gari totzü nung kerosene enoker alir, jang tajung seret nung sen  asem agi alitsüba jang to jang tamajung den meyokteper sen 30 agi alir. Tangara sen agi dang alir, anungji kecha masü ita ishikabo ita sen agi menoktettsü ta jembia jembia sorkar mapa ajak  bazaar oset amato kümogo. Iba ama kecha masüba tebilemtsü agi kibong shia nung jala jabasotem zünger mapa mangu shisabolutepdagi. Ibaji kecha masü, odang tokjang, ajaki inyaker nung ta asüba nungi adokba tebilemtsütem lir. Mapa meinyak ser sen agizüka achibaji shitak masü, nübortem nem jenjang ajemer agütsütsüba jangotsü aser osettsüset magütsüi tangar dang yokadokbaji kecha masü masütsüla. Aji oda, department mali ama gari jaja majung lenmang ayubaji kecha masü masütsüla. Lanurtem zünger mapa mangubaji kecha masü masü aser odang tokjang ta asütsüla masü. Tamajung aser ochimashi mapatem odang tokjang ta asüba agi tanübo odang toktsütsüla masüka asenok kangshidagi. Joko, odang toktsütsüba masü ochimashi mapatem anema nokdaktsüla aser kecha masü masü saka kechi shitak aji inyaktsüla.