ODI Series: Australia-i India wicket 7 agi koka temaba jenjang angu

Brisbane, January 15 (Agencies): Australia’er cricket teloki India madak wicket 7 agi takok angüba sülen points 2-0 ngua temaba jenjang tanü Hokolbar nü nguogo.

Par linük ana tsüngdang tang tasayadak asaya 5 densemba One Day International (ODI) series anogo tanabuba nung India-i tanü wickets 8 laoa ajak agi runs 308 yanglu saka Australia teloki par wicket 3 laoa ajak agi runs 309 ngua India-i yangluba runs ajangteta takok angu.

Australia teloki tan January ita 12 nü Perth nung asayaba mezüngbuba ODI asaya nunga takok ngua liasü.

Tanü asaya nung Rohit Sharma-i külem asayar, Virat Kohli den aroki runs 59 aser Ajinkya Rahane den aroki runs 89 yangluba densema, ajak agi runs 124 tashi yanglua India asoshi kanga junga asaya.

Tanü century yanglubaji densema, Rohit-i cricket asayatsü tenzüker tanü tashi nung 10 buba ODI century yanglur kümogo.

Ajisüaka, Aaron Finch aser Shaun Marsh nati aroki lungjemer runs 145 tashi yanglutsüba sülen George Bailey-ia ball 58 nung runs 76 tashi yanglua kanga junga asayaba yong par Australia teloki tanü asayaji kokadok.

“Tanü asaya nung runs 100 dak tema yanglua shilem agiba sülena tamoker aküma atema tezüdanga bilemer,” ta Rohit-i tesülen metetdaktsü.

Australia aser India nati par tasembuba ODI asaya Melbourne yimti nung tan Deobar nü asayatsü.