ODI Series: Australia-i takok angutsüsa jenjang nguogo

Canberra, December 06 (Agencies): Opener David Warner-i century yangluba ajanga par Australia teloki runs 116 agi New Zealand telok madak tanabuba One-Day International (ODI) series asaya tanü, Mongolbar nü kokogo.
Taoba asaya akokba densema, Australia teloki asaya 3 densemba ODI Series nung asaya 2 tashi koka, Series akoktsüa points 2-0 agi N Zealand telok den temaba jenjang angur lir.
Warner-i tanü ball 115 nung runs 119 yangluba den par captain, Steve Smith-ia runs 72 yanglua yarisemba yong par Australia teloki tan asaya nung wicket 5 laoa, ajak agi runs 378 yanglua liasü.
N Zealand captain, Kane Williamson aser külem asayar, Jimmy Neesham natia runs 81 aser 74 yanglua kanga meranga asaya saka par wicket ajunga 48 buba over nung laoa, par teloki runs 262 dang yangluba yong par N Zealand teloki tamakok ajuru.
Tan century takok ngua yangluba sülen Warner küm 1 nung ODI century 6 tashi yanglur Australia batsman mezüngbuba kümogo.
Alimar batsmen tarensen nunga ODI century 9 yanglusang, Sachin Tendulkar aser ODI century 7 yanglur, Sourav Ganguly na sülen anidaka, küm 1 nung ODI century timtiba yanglur asayar tarensen nung Warner tang 3 buba jenjang nung lir.
Warner-i taküm, 2016 küm tenzüker tanü tashi nung ODI asaya 22 nung ajak agi runs 1,220 tashi yanglua aliba osang bushitetogo.
Ano külen, Australia aser N Zealand telok nati par tatembangba asaya tan Hokolbar nü Australia kübok Melbourne yimti nung asayatsü renema lir.