Odisha Angh S. C. Jamir taküm otsü kaket sayaogo

April 07, 2016 nü Raj Bhavan Abhishek Hall nung Odisha Angh, Dr S. C. Jamir, kinüngtsü Wt. Alemla Jamir aser nüngtugu sangro zülur, Wb. Ramakant Rathpa nunger lia Chief Minister Wb.Naveen Patnaik-i sentong ka nung Dr.S.C.Jamir taküm otsü katet ” A Naga’s quest for fulfillment ” sayatsüba noksa nung angur.

Bhubaneswar, April 07 (Agencies) : Odisha Angh, Dr S. C. Jamir taküm otsü kaket ‘A Naga’s Quest for Fulfilment’, Bhubaneswar Chief Minister Naveen Patnaik-i Brihostibarnü sayatsüogo.
Jamirba taküm otsü kaket nung pa libaliroa aruba mapangtem indang kanga jangja zülua lir aser Nagaland mesemtetba nung pai inyaktetba osang tejangja dena lir.
“Iba kaket nung S. C. Jamiri pa taküm nung ajangshiba, pai lokti aser yimten atema shia bilemba, tensa tamajung aika nung shilem agia pai akok tashi shisa tajung tuyuba aser Chief Minister mendeni aginüba ama takok ngua yimsü asüba otsü tejangja zülua lir aser item otsü yagi nüburtem kanga ajungmesotsü,” ta Raj Bhavan nung Jamirba kaket sayatsüdang Patnaik-i ashi.
Kaket nung pai inyaktetba mapa tulu aika zülua lir aser ibaji ajanga pa taküm tali telungi ia angateter. Tang pa kanga junga meteta alirtemia dena iba kaket nungi langka tasen  kabosa angazüktsü,” ta Patnaik-i shisem.
Tang tensa nung nükjidong tongtetba tebilemba tajungtem nüngdaker ta ashidang Patnaik-i, “Tetsükdaktsü aser tebilemtsü tasentem koktettsü asoshi asenok atema tebilemba tasen nüngdaker,” ta shisem.
Jamirbai inyaktetba mapatem ajanga tarutsü nung nüburtem putu aika ajungmesotsü ta ashiba mapang pai, “Iba taküm otsü kaket ajanga tebilemba tasen nüngdakba kanga jangja tuteta ashir. Pai iba kaket nung ajak shia lir aser nüburtemi mela mela angatettsüsa züluba ajanga iba otsü tezüngnütsüka lir,” ta lemsatep.
Tang India yimtenren tsütsü S. C. Jamir ya ajaki akümtsübua amshiba yimsüsür ka lir. Pa dang ‘architect of modern Nagaland’ ta ajar.
Tesüiba mapang linük Ato Kilonser Pandit Jawaharlal Nehru aser Lal Bahadur Shastri nunger mapang nungi pa Parliamentary Secretary ama inyaka linük yimsüsüba tsütsü shilem agia aru.
Nagaland nungi mezüng MP, Nagaland nung pezüben tashi Chief Minister, Union Minister, Goa, Maharashtra aser Gujarat nung Angh inyaksang aser tang Odisha nung Angh, Jamirba taküm otsü ajanga, pai pa nükjidong nung kanga akhanga soter marakzüi tangar ajak dang nungi balaka tuteta adoka India yimten nung shilem agitetba asenok ajaki kanga jangja meteter.