Odisha assembly nung GST Bill agizükogo

Bhubaneshwar, Sept. 01 (Agencies): Brihostibarnü Odisha Legislative Assembly nung Goods & Services Tax (GST) Constitution Amendment Bill agizükogo.
Iba bill agizükba state 16 bubaji parnok asütsü.
Odisha Assembly nung Chief Minister, Naveen Patnaik-i GST amendment bill dak sentakba bangzüng ka benoka CPI(M) züngsem ka dak alaka züngsem ajaki ibaji agizüka liasü.
Tawa Parliament House anaprong nung Constitution (122nd Amendment) Bill, 2014 agizüka liasü. Iba ya Tiri agizüktsü atema linük nung state tem tesadang katibosa agizüktsüla.
Opposition Congress züngsemtemi saru dak sentakba nung takhangba ka agütsüba langzüdang chief minister, Patnaik-i, “GST dak alia Green Tax atema onoki India sorkar nem temeja takhangba ka agütsütsü,” ta ashi.
“Onokisa Centre dang 2016-17 küm atema state tem asoshi CST temenokji shilem 4 nungi 2 kümjang ta mepishitsü,” ta paisa metetdaktsü.
Chief minister-isa, GST ajanga Centre aser state sorkar tem dang masü saka consumer tem, business aser industry ajak tajangzük angutsü, ta ashi.
“Osettsüset ajak nung saru khuret ajema akumtsü imlar. Sorkari saru aika angutsü. Business aser industry atema-a iba inyakyim temelaba asütsü,” ta paisa shisem.
Tamalen Assam, Bihar, Jharkhand, Himachal Pradesh, Chhatisgarh, Gujarat, Madhya Pradesh, Delhi aser Nagaland densema state 15 nung GST amendment Bill agizüka liasü.