Odisha bus lendong nung nisung 21 tsükset, 50 jungnüa yiru

Bhubaneswar (Odisha), September 09, 2016: Hokolbarnü Odisha, Angul district kübok Athamallik nung tsükokba bus noksa nung angur. Nija bus ji Boudh nungi Athamallick-i aodang bus anisangi gariji mazüokteti tsükokdakja iba lendong nung nisung 21 asü aser aika yiru.

Bhubaneswar, September 09 (Agencies): Tanü Odisha, Angul district nung bus ka apu nungi feet 50 lua tsükokba lendong nung tajemba agi nisung 21 süogo aser nisung 50 jungnüa yiruogo.
Boudh nungi Athamallik-i aoba bus ji Manitri apu nung tsükok, ta DGP, KB Singh-i ashi.
Osangbenertem den jembidang Chief District Medical Officer, Angul, Dr Bidyadhar Sahu-i, “Iba tatalokba nung tang tashi nung nisung 21 süogo. Nisung 16 Athamallik nung asü, parnok rongnung nsiung 14 bo lendong atalokba tesem nungjisa atanga asü, aser Angul nung aliba district headquarters hospital nung nisung pongu asü,” ta metetdaktsü.
Paisa, Angul nung aliba district headquarters hospital-i anir aruba nisung 43 rongnung nisung 5 asü, nisung 23 SCB Medical College Hospital-i anir ao aser kanga mejungi yirua alir nisung kar tayimtsü ajanga Cuttack-i anir ogo, ta ashi.
Tang State Health Minister, Atanu S Nayak SCB Medical College nung monga tensaji ketdangsüdar.
Nayak-i, “Onoki doctor tem special teams tentetogo aser yirua alirtem  special ward nung anepaludar. State sorkari lemtetba ama parnok nem medical teyari angati agütsüdar,” ta metetdaktsü.
Iba osang angashiba sülen state Chief Minister, Naveen Patnaik-i, yirua alirtem nem medical teyari angati agütsütsü aser iba lendong nung asür kibong shia nem sen lakh anana agütsütsü, ta sangdongogo.
Ano külen Ato kilonser, Narendra Moi-ia twitter ajanga asüko osang lemsatepogo.
Modi-i, “Odisha, Angul district nung bus lendong atalokbaji tejashitsüka lir. Mangyimba kibongtem aser yirua alirtem atema ni sarasademtsür,” ta ashi.
Iba dak alia Union Oil Minister, Dharmendra Pradhan densema lenir aikati asüko osang lemsatepogo.
Passenger kari ashiba agi, iba gari lendong atalokdang bus anisangji mobile phone nung tejembitak liasü. Ano tenük kuli alir katia, “Bus anisangji phone nung jembidang tejaklen nungi tanur ka cycle nung ajungbena aruba ajanga iba lendong atalok,” ta ashi. State Transport Minister, Ramesh Majhi-i RTO dang iba tatalokba bushisüngdangtsü tuyuogo.