Odisha-Chhattishgarh arrtsülen Maoists 3 tepset

Malkangiri, August 01 (Agencies): Malkangiri-Chhattisgarh arrtsülen Tandiki arem nung security sepaitem den kahtepba mapang tetsür ana densema Maoists telungpur asem kahsetogo, ta police-i ashi.
Osangbenertem den jembidang telungpur mita aoba telok lenir Maklangiri SP, Mitrabhanu Mohapatra-i, “Onoki Maoists asem tasümangji nguogo- raraba tesem nungjagi tetsür ana aser tebur ka tasümang angu. Iba rara nung iba dak alia telungpur tali kahsetba osangbo mali,” ta ashi.
Intelligence osang nung ajemdaker Odisha elite special operation group (SOG) aser district voluntary force (DVF) nati-a iba operation nung shilem agiogo, ta police ketdangserisa ashi.
“Arem telung nungji Maoists telungpur tesep bushia aoba mapang ajungbena parnoki security sepaitem dak injang kahloktsü. Iba sülen onokia injang kahloktsüba mapang parnoki prangpong pongu den tanga oset kar toktsür jenshi,” ta SP-i ashi.
Maoists telungpurtemji Martyrs Week amungtsü atema senden amenba mapang parnoki amak, ta paisa ashi.
Iba tesem nungjagi Insas prangpong ka, SLR rifle ana, country-made prangpong ana aser tapoktsü oset den injang aika ngutetogo, ta paisa shisem.