Odisha nung alenseter lia anguba Manipur nunger asangur mang tanaben rangsa reprangtsü

Bhubaneswar, December 11 (Agencies) : December 2, 2015 nü Bhubaneswar nung süngdong ka nung alenseta sür aliba Manipur nunger L Poumai indang mang tanaben rangsa reprangtsü atema Commissionerate of Police-i telemtetba agiogo.
Brihostibarnü tasüsanger kinungertemi taitsü keta lir ta ashiba sülen police-i nisung tepsetba ken o ka benok. Mezüng nungbo police-i asür L Poumai ji pa sasa alenset ta temulung melemi bilem.
Brihostibarnü Imphal nungi DSP ka Bhubaneswar tongogo aser pai Bhubaneswar yimti nung aliba police-i bushisüngdangba maparen reprangshimtsü.
December 2 nü asür L Poumai indang mang rangsaa reprangba sülen Capital Hospital morgue nung yua liasü aser tang pa mangji SCB Medical College & Hospital-i bener ogo.
“Par kinungertemi mezüng rangsa reprangba nung temulung masüba metetdaktsü aser iba jagi SCB doctor temi magistrate ka lia mang tanaben rangsa reprangtsü. Iba mapang video dena agitsü” ta Commissioner of Police, R P Sharma-i osangbenertem dang ashi.
Manipur sorkari Odisha state home department dang iba ken o jungjunga bushisüngdangtsü atema mepishia metetdaktsüogo.
Asür Poumai’er kinungertem den Guwahati nung okatsür ka taoba Hombar nungi Odisha yimtiba Bhubaneswar nung mungzüka lir.