Odisha nung anogo ananü BJP National Executive senden tenzükogo

Bhubaneswar, April 15 (Agencies): BJP indang anogo ananü National executive senden Honibarnü Odisha yimtiba, Bhubaneswar nung tenzükogo, aser iba senden nung Ato kilonser, Narendra Modi densema bangdak lenirtem aika dendar.
Ajisüaka iba senden nung External Affairs Minister, Sushma Swaraj bo temang manemi aliba ajanga medenteter, ta Union Minister of State for Petroleum & Natural Gas, Dharmendra Pradhan-i metetdaktsü.
Hokolbarnü BJP-i, Ato kilonser Modi-i Odisha ya sensakertem atema schemes asoshi laboratory asütsü lemtetogo, ta metetdaktsü.
Union Petroleum & Natural Gas Minister, Dharmendra Pradhan-i, “Odisha nüburtemi Ato kilonser, Modi agizükteter, joko nüburtemi BJD dang jashir. Nüburtem melungjang melenshiogo, aser ibaji Panchayat election nung nisung aikati BJP nem vote agutsüba ajanga sayur,” ta ashi.
BJP-i aniba NDA sorkari tesüiba küm asem tsüngda Odisha nung railway terenlok atema sen crore 5,200 lemzükja liasü. UPA yimsüsüba mapang nungbo railway budget nung Odisha nem sen crore 1,000 dang lemzükja liasü, ta Pradhan-i ashi.
Paisa, Odisha nung yimtsüngtem nung terenlok atema Centre-i sen crore 3,000 lemzüktsüogo, ta metetdaktsü.
Odisha nung Lok Sabha menden 21 nungi BJP nungibo MP ka dang lir. Ano menden 147 aliba Odisha Assembly nung BJP züngsem 10 dang lir.