Odisha nung Japanese Encephalitis tashitak agi tanur 73 tashi süogo

New Delhi, November 02 (Agencies): Odisha, Malkangiri district kübok yim 505 nung Japanese Encephalitis tashitak pokteta tanur 73 asüba sülen tanur kati Ato kilonser, Narendra Modi dang teyari meshia shidi ka züluogo.
Ketdangsertemi ashiba agi, iba tashitak agi asür tanur 73 jungogo.
Ajisüaka Malkangiri chief district medical officer, Uday Shankar Mishra-ibo, JE agi tanur 27 asü saka tanüngba tanurtemjibo kuli balala ajanga asü, ta ashi.
Ato kilonser dangi züluba shidi nung arishi küm 10 tanur Umesh Madhi-i, “Onok taküm kümzükang. Ozü medemertem Japanese fever agi süogo. Nai alima sema senzür. Nai ozü yimtak semdanga yangi tanurtem asüba mereprangtettsü asü?” ta ashi.
Sikapali gram panchayat kübok Polkanda Primary School nung class pezü nung azünger Madhi-i Japanese Encephalitis agi asür tanurtem tsüraburtemi ajangshiba indanga lemsatep.
Pai shidi nungsa, “Sir, nai linük balala aika sema senzür. Na ozü yimtaki arua yangi nüburtem timtemba mereprangtettsü ama?” ta asüngdang.
Tribal nisung jenti aliba Malkangiri district kübok yim 505 nung JE wara pokteta lir.
Tanü state sorkari, tesüiba anogo asem-pezü tsüngda tensa tamajungba kümogo, ta sangdongogo.
Tang Malkangiri nung Officer on Special Duty (OSD), Nruparaj Sahoo-i iba tensa repranga achaayangdar aser pai, iba tensa imlaba ama tajungba makümer, ta shiogo.
“Iba wara azüoktsü atema district ketdangsertemi mera aika agiaka iba tensa tajungba makümer,” ta pai osangbenertem dang ashi.