Odisha nung ‘Komen’ yipru süitsü

Bhubaneswar, July 30 (Agencies): Brihostibar nü Odisha sorkari “Komen” yipru tesashi arutsü sangdongogo, aser taruba ghonda 24 nung tzüyimkümlen tesemtem nung tzünglu kanga sashia arutsü metetdaktsüogo.

Water Resources Secretary Pradeep Jena-i ashiba agi, district collector tem dang Komen yipru asoshi kanga kümküma alitsü metetdaktsüogo.

Iba dak alia Met department-ia angopurtem dang tzüyimi angopui maotsü metetdaktsüogo.

Jena-i ashiba agi, Baitarani, Subarnarekha aser Budhabalanga ayongtem nung Bodhbar nü tzü lendongbang adena yima liasü saka tangbo ajema kümdagi.

Tanü Indian Meteorological Department (IMD) ketdangser G.C. Debanath-i, Komen ta ajaba yipru mopung aonbaji meyiptsüa akok aser West Bengal leni aontsüa akok, ta metetdaktsü.

“Iba mopungji meyiptsü aser West Bengal tsütsüleni aontsü. Iba mopung jagi south-west Bengal district sashia kongshitsü aser tzünglu sashia arutsü imlar,” ta MED ketdangserisa ashi.

“Angopurtem dang tzüyimi maotsü metetdaktsüogo. Tang aliba mopung tatsük aser temperature ajema akümtsü. Ano district kar nung tzünglu kanga arutsü. Kolkata aser iba yimti meketa aliba tesemtem nung tzünglu teyari ka arutsü,” ta pai shisem.

‘Komen’ yipruji tanep northeast Bay of Bengal nung Chittagong southwest len nungi kilometer 80 pilar aser Kolkata east-southeast nungi kilometer 300 pilar liasü, aser tang north-northwest tsütsüleni ondagi aser tanü nikongdang mapang mashi ka nung Bangladesh süitsü.

Taruba ghonda 48 nung West Bengal aser north Odisha tzüyimkümlen mopungji ghonda ka nung 50-60 kilometer tekara aontsü.

Ano taonung aser asüngnep Mizoram, Tripura, Assam aser West Bengal nunga mopung ghonda ka nung kilometer 40-50 kara aontsü.

Iba yipru ajanga taruba anogo asem Gangetic West Bengal aser Odisha tesem aika nung tzünglu sashia arutsü, ta MED ajanga metetdaktsüogo.