Odisha nung Maoists 188 temai adok

New Delhi, April 10 (Agencies): Maoists telungpur den raratepba nung takok tulu ka ta züngshitsüsa Honibarnü Odisha, Malkangiri tesem nung Maoists aser parnok pusema inyaker nisung 188 security sepaitem matsüngdangi aruogo.
Telungpurtemji CRPF(Central Reserve Police Force) indang 202 Cobra unit aser state police ketdangsertem matsüngdangi arua parnoki raraba osettem toktsü.
Telungpurtem rongnung Maoists Militia züngsem 25, yimtsüng committee züngsem 10 aser Maoist pusema inyaker 154 liasü, ta security sepai aser police ketdangsertemi ashi.
Hopta ana tejaklen Maoists-i Chhattisgarh nung CRPF tem amakba sülen tang Chhattisgarh aser Odisha na nung Maosits telungpur aika temai adokogo.
Honibarnü Chhattisgarh, Sukma nunga tetsür 11 densema Maoists telungpur 122 police matsüngdangi temai adoka liasü.
Ketdangsertemi ashiba agi, sepaitem atema Chhattisgarh nung shisabulutsü tuluka lir, kechiyong iba state arem nung telungpur 1,500 shi lir aser parnok yarisema inyaker nisung 10,000 shi lir.