Odisha nung Maoists 3 kahset

Malkangiri, September 19 (Agencies): Honibar nü Odisha, Malkangiri district kübok arem ka nung security sepaitem den kahtepba mapang Maoists telungpur asem kahsetogo, ta police-i ashi.
Osang ka lazükba sülen Special Operation Group (SOG) aser District Voluntary Force (DVF) na senteper Mathili tesem nung aliba Bhejaguda arem nung Maoists telungpur mita aoba mapang security sepai aser telungpur na tejak chitepa ajurutep, ta Malkangiri Superintendent of Police, Mitrabhanu Mohapatra-i ashi.
Iba sülen parnok tsüngda kahtepdang Darabha Maoist division area committee züngsem Sunadhara aser pa tanüker ana kahset, aser tanüngba telungpur aika jena ao, ta paisa ashi.
Iba tesem nungjagi pistol ka, techira oset kar, walkie talkie set kar, Maoist uniform aser telungpur shidi aika nguogo.
Sunadhara ya Maoist nung tongti lenir ka liasü. Odisha, Mathili tesem aser Chhattisgarh, Darabha region nung temzüng alema inyakba ken o aika nung pa densema liasü, ta police-isa ashi.