Odisha nung puja bomb apokba atema nisung ka tepset

Bhubaneswar, Mongputeni/October 28 (Agencies): Deobar aonung Bhubaneswar nung nisung ka puja bomb apokba atema tepset. Amaresh Nayak aser par medemertem Bhubaneswar kübok Sundarpada tesem nung bomb poka aliba mapang nisung telok kati parnok nokdanga liasü, ta police sangdong ka ajanga metetdaktsü.
Parnok tsüngda mangatettep adoka asatepba sülen nisung 15 shikati Amaresh dak azük tenzük. Iba sülen pa Bhubaneswar nung Capital Hospital-i aritepa anir ao koba pa tasü bener aru ta sangdonga liasü.
Kasa mapang nung Odisha nungsa Deobar aonung Diwali dak sendakba tatalokba balala nung nisung ana asü aser nisung asem yiru.
Bhadrak district nung nisung ka Diwali atema decoration inokba mapang light current agi apu aser Keonjhar district nung nisung ka rongseta asü.
Bhadrak district nung alir Prakash Chandra Ojha, decorative light tem mesentepa aliba mapang current agi apu. Pa mozükidangi aritepa anir ao saka lentom nung süadok.
Keonjhar district nungi Sukadev Munda, shiba Anandpur tehsil office nung clerk ka lir, pa Sadha Chhak nung par kidang rongseta asü. Munda mejanga aliba mapang par kidang poja bomb ka tsükba sülen pa rongseta asü, ta police temi metetdaktsü.
Maneni Balasore district nung yijemer ka aser par jabaso Diwali amungtsü atema kidangi oya aliba mapang apu ka nungi tsüka liasü. Airi Munda aser jabaso Bapun Munda na poja bomb alir kidangi meyipa oya aliba mapang apu nungi tsüka ayongi ai. Yimdaklirtemi Munda bo kümzükogo saka par jabaso kong ali tang tashi mejangjai lir.