Odisha nung shiruru merirjang aika tepsetogo

Bhubaneswar, October 21 (Agencies): Taküm-a Bodhbar nü Odisha, Kalahandi district nung aliba Manikeswari tekülem ki anasa ozü aser shiruru merirjang aika tepseta tsüngrem nem tenla agütsüogo.

Anogo ishika tejaklen nungi district ketdangsertemi tekülem ki anasa lenmang tip anatsülen shiruru tepseta tenla magütsütsü atema shiaka Bhawanipatna nung ‘Chhattar Yatra’ benjung tenüng nung shiruru tepseta iba tekülem ki tsüngren nem tenla agütsüogo, ta ketdangsertemi ashi.

“Shiruru tepseta tenla magütsütsü atema onoki ozü ketdangsertem den ayongteper nüburtem nem tesayuba agüja liasü,” ta Kalahandi, Superintendent of Police, Brijesh Kumar Rai-i ashi.

“Onoki onok tajungtiba agi inyakaka parnoki shiruru tenla agütsüogo. Tarutsü nungbo onoki tesayuba agütsüba ajanga iba ama mataloktsü imlar,” ta paisa ashi.

Iba benjung nung nisung merirjang aikati shilem agiogo aser iba tsüngremji reprangogo.

Sandhi Puja agiba sülen iba tsüngremji Jenakhal nungi Bhawanipatna-i bener ao.

Yimti nung mepetmesü mataloktsü atema ketdangsertemi police platoon 10 yoka liasü.