Odisha nung taruba sorkarji BJP-i akümtsü: Amit Shah

Bhubaneswar, July 4 (Agencies): Taruba Odisha sorkarji BJP-i akümtsü ta Bharatiya Janata Party (BJP) tir Amit Shah-i Mongulbarnü metetdaktsü.
2019 assembly elections nung BJP-i shilem asemsü nungi ana nung takok angutsü, ta paisa shisem.
“Ni booth jenjang nung mapa inyaker aser ni teküpoktiba jenjang indang tensaji meteta lir. ni asadangtetba agi, BJP-i taruba Odisha sorkar akümtsü” ta Shah-i ashi.
Odisha Chief Minister Naveen Patnaik’er district Ganjam kübok Hugulapata yimtsüng nung sentong ka nung jembidang BJP tiri iba osang metetdaktsü.
“Odisha nung ali rongsen peria liaka, terenlok mali. Odisha nung kilen ajak nung electricity mali, tzü tajemtsü mali, metsümeshidak mali aser zünger mapa mangur tasüng lir. State sorkari kechi inyaker? Kechiba iba state nung terenlok mali?” ta Shah-isa asüngdang.
Taoba küm 25 den medemdangra, tesüiba küm 3 tsüngda Narendra Modi-i aniba Centre sorkari Odisha nem sen teimba agütsüogo. Taruba anogotem election booths 36,000 tashi itshitsü, ta paisa metetdaktsü.
`Mo Booth Sabuthu Majboot` (Kü Booth tashi taittiba) sentong kübok Amit Shah den Petroleum Minister Dharmendra Pradhan, BJP legislature party lennir K.V. Singhdeo aser tanga lennir tejenteni Hugulapata yimtsüng nung booth level mapa inyakertem den senden amen.
BJP-i inyakba Dalit outreach programme nung shilem ka ama, Shah-isa OBC kibong ka nung chiyung.
Shah-i anogo asemnü atema Odisha semdanger aser pai Bodbarnü Jajpur district semdangtsü sentong lir. Jajpur nung pai Biraja temple semdangtsü aser booth-level mapa inyakertem den ajuruteptsü.
BJP tirisa July 6, 2017 nü Khurda district nung BJP Zilla Parishad (ZP) züngsemtem, block presidents aser vice-presidents den ajurutepa senden amentsü.