Odisha sorkari Dutee Chand nem crore 1.5 agütsütsü

Luroi/August 27, 2018 (Agencies): Indonesia nung tang tasayadak 18buba Asian Games nung takok tajung anguba atema Odisha sorkari asemteper Dutee Chand nem sen crore 1.5 agütsütsü sangdongogo. Odisha nungi asemteper Dutee Chand-i Amungnü tetsür 100m finals nung alizüng second 11.32 nung tongteta silver medal angu. Odisha Chief Minister Naveen Patnaik-i iba senpet agütsütsü asoshi Tentonü sangdonga liasü. Kasa mapang nung Odisha Olympic Association (OOA)-i Dutee nem sen 50,000 agütsütsü sangdongogo.
“Küm 20 sülen Asian Games nung Odisha nungi asayar kati linük asoshi konang tetushi bener arutsüba ya nema adangtsü maparen ka lir. 1998 Asian Games nung Odia Athlete Rachita Panda Mistry-i bronze medal kokteta liasü,” ta Chief Minster’s Office (CMO) sangdong ka ajanga metetdaktsü. “Lai temulungtetba tulu yur meranga inyakba reprangteta Chief Minister-i Dutee Chand nem senpet sen crore 1.5 agütsütsü sangdongogo,” ta kasa sangdong ajanga metetdaktsü.
Dutee Chand-i takok tajung agnuba atema linük ajunga nungi lokti tentet balala aser kijai la tenüng sang arudar.
Kasa mapang nung asaya tembangba sülen PTI den sensaksemba mapang Chand-i ashiba agi, “2014 küm ya kü asoshi tamajungtiba küm ka liasü. Nüburtemi kü indang aika jembiogo. Kasa tetsüri meyipa arua linük atema medal ka koktetogo aser iba ya kü atema takok kanga tulu lir. Semifinal nung mezüngbuba meter 20 ni kangabo temulung agüja masem aser coach-i kü dang tetenzüklen junga asemtsü asoshi ashi, anungji final nungbo ni tenük amor asem. Kü asoshi medal akoktsüji tongtibang masü saka takaraba nung alizüng atongtsü dang bilema asem.”