Office kakpoka tur auyatsü meranger ka apu

Dimapur, September 21 (TYO) : September 20, 2016 anepdang 1:30 ako meta Directorate of Economics & Statistics, Kohima indang office kakpoka auyatsü merang, ta Sub-Divisional Police Officer (South) & PRO Kohima-i sangdong ka nung metetdaktsü.
Auer jagi window grills agizüker office telungi ai aser iba sülen kishi ana kakpoker telungi itet. Ajisüaka, office anüktsü atema mapa lemzükja aliba police temi auerji apu, ta sangdong nungsa ashi.
Auersangji arishi küm 35 tain Sato Lohe aser pa ya Suthozu Nasa yimer Zaveyie Lohe’er jabaso ta jangjaogo. Pa ya Paramedical colony, Kohima nung telidak lir aser pai auya bener aotsü merangba osettem ajak Department ket nung agütsüogo, ta Kohima Police-isa metetdaktsü.
Iba dak sendakba nung Kohima North PS nung ken o ka benokogo aser maneni bushisüngdang südar, ta parnokisa shisem.