Offline sales atema Huawei aser Micromax na longjemogo

Chiteni/July 24, 2019 (Agencies): China nunger smartphone yangluba company tetsüti Huawei aser Indian consumer electronics firm Micromax Informatics na India nung off-line sales ajungkettsü atema longjemogo.
“India nung onok indang smartphone tem multibrand outlets nung sayatsü atema Micromax den longjemogo,” ta Consumer Business Group, Huawei India, Vice-President, (Huawei Brand), Rishi Kishor Gupta-i IANS dang ashi. Ajisüaka Huawei indang online brand Honor phone iba tezüngzüktepba kübok maittsü.
“Micromax brand store tem nung Micromax phone tem angutsü, saka distribution aser retail network koba yangluogo iba kübok Huawei capitalize asütsü,” Micromax Informatics Marketing Head, Deepti Mehra-i ashi.
“Co-branding kecha malitsü aser Micromax pur maneni phone tem yanglua sayatsü. Iba tenangzüktepba nung kecha tetsükdaktsü madoker kechiyong Micromax pur mass segment dak rangloker inyaker aser Huawei pur premium category dak rangloker inyaktsü,” ta lai ashi.
Huawei ya alima nung smartphone ayokba company rongnung tanabuba jenjang nung lir aser India nung shishilembdak 2018 küm nungi ajemoka inyakdar.
India nung parnok online ajanga shishilemba tenzükba sülen Huawei puri Chroma den offline products tem amenok. Maneni parnok Poorvika Mobiles den longjemer southern state tem nung shishilembaba atsülangshia ao.
Micromax den sendaktepba sülen parnok linük ajunga ayimjema inyaktsü nükjidong lir, kong yimtitem rongnung Delhi, Mumbai, Pune, Chennai, Kochi, Bangaluru, Hyderabad, Ahmedabad, Dehradun, Kolkata aser Jaipur nunger ayimjema inyaktsü sentong lir.
“Customer tem aliba tesem ajak ayimjema inyaksangshitsü nükjidong nung onoki offline distribution network atsülangshir aser iba ajanga yimti tem nung dang masü saka yimdak yimtsüng nung aliba nüburtem nem innovative technology tajangshiba ka agütsüner, koba alima ajunga nung kanga junga agizükogo,” ta Country Head (Huawei Brand), Consumer Business Group, Huawei India, Tornado Pan-i ashi.
Huawei puri 2018 küm smartphone million 200 yokogo aser taküma May tatem tashi nung device million 100 yokogo.