Oh Kaziranga!

– Mrs. R. Mapukala, Chuchuyimlang.

Oh! KAZIRANGA! Ibai asen kidanger Assam nunger li masü no!
Par asoshibo nungtugu aser temoatsü topur tajung tesem ka,
Tsüngremi yangluba shirurutem wazüka ayuba tesem
Saka küm ishika tsüngda kanga bulua iba tenüng angashir,
Ya kodaser, shibai puratet, shibai nguoka ayu, nüburtem süngmanger.
Shiba sentong nung ongpanglu tsükbener ama nungzüteper!
Otsüla Oboula nunger par azü agi alangzükba libo masü südija..
Idakji asen Naga nugner senmangbo kecha melili ?
Ajagi maoyonga na aliba tesem nunga jembitettsü masü na !

Oh! Ozü madak lenir yimsüsür tajungtem, nür nüburtem ya kechi tia nung yutsür
Nai election nung onok dang nangzükba to koda, bilemdangangni..
Nai jembiba ajak to tiyazü tang, mapa mali tazüngla
Naga nungerbo ochishir kin ta jembia aru-ajai, süra tanübo koda,
Hai! Tanü asen AORTEM, tangar ASEM atemer, na aniseta tsüngsanger.
Asen Aor Tsüngremi shimtetba kin, Aorji Aorsa asütsü,
Akhi nungi asenokji balaka nung yanglua lirko, ya tebilemdangtsü o
Asen jakdang Aor lenirtem koma liasü, shisadangang, par mapatem to..
Kechiba yabo tim masü-a ta meshiteter… nüburtem anüngba ola ulura kümogo.

Na yimsüsüba mapang küm pongo to tonga arudar,
Nübur ajak dang meima tajung inyaktsü nai nangzükba to
Ni atokdaktsüra ochishia yimsü asütsü ta nangzükba to,
Temelenshi tapu balala bener arutsü ta nangzükba to,
Naga lima asoshi bener aruba rongsen ochishia amshitsü ta nangzükba to,
Government tenzükertem nem tangutsü sen mapang shitak nung agütsütsü ta nangzükba to,
Ni adokra, Nagaland tasen ka kümdaktsütsü ta nangzükba to
Tsüngrem akümtsübua yimsü asütsü ta nangzükba to
Kin ka meraket aser maitsüji lenmang, ni adokra yanglutsütsü ta nangzükba to
Kua! Nai nangzükba shitak inyaktsüogo ma ?
Nisungi majunga ta shira, ne mapa, kibong aser taküm lenmang kodanga azükaru masütsü.

OH! NAGA nunger, arung apusodi, otsüla oboula nungeri matsüngshiago,
Tanü asenok par züh, tangar dang nungi balaka jatetogo,
Ola adokang, kechiba ajem-ajema alir, temulungi maremteterato!
Azüh tokshia meraratsü, saka ochi nung ayimtena apusotsü tanü mapang masü no.
Tetsür, tebur tependang mali NAGALAND temelenshi ka asoshi ayimtentsü,
Kechiba ngur sür nung mangu ama, angashir sür nung mangashi ama alir,
Tanü NAGA nunger lanurtem kwika asen lima mapa maka nung,
Bendang lima sünga arangoka lirji, itemji asen lima yanglutsür pur masü no?
Joko ya lanur putu, nüburi lanurtem nem yimli agüjang,
Asen lima yimsüsürji aika-shirongjibo-shirongsa asütsü- par züh memelentet,
Par nungi jakzükba San chanubosa masütsü südi ja.

Arung… tanü asen Naga nunger, asenok ya Tsüngremi shimtetba kin,
Hoi! Lanurtem tejakleni arung, atsükshia teli, kumkumshiangni,
Ner Tetsü Tebou, tsüraburtem, lanu ain ajak ne sülen lirko,
Shiba tsübur, kechiba tasü maiter? Nenoki meyanglura asen lima shibai yanglutsü,
OH! Asen nüburtem…Tsüngrem tsübuba lanur lenir shimtsü
Alima yanglutsü tekolok shisatsü akar lanur lenir shimtsü
Tasü tait ochi nungbo tasütsüa metsübuba lanur lenir shimdi
Rongsen nung ochishia ketdangsüba lanur lenir shimdi
O tanang agi memesüzükdaktsüba lanur lenir shimdi
O aika mejembi-i mapa küma inyaktetba lanur lenir shimdi
Yi jema asüküma tangar mezüngshi nükdapangta masüba lanur lenir shimdi
Ajak dak alaka ajemalu, Tsüngrem tsübuba lanur lenir shimdi
KAZIRANGA lenmanng manguba lanur lenir shimdi, arung.