Oh Nagaland Na Renema Lirma

– R. SUBONG OZÜKÜM.

Tang alima nung tashidak wara tesashi “Corona virus” kanga kera-a pokshia aoba anogoshia osang kaket aser television osang ajak nung tetsübutsüka angur aser angashir. Asen India lima nunga anogoshia iba Corona Virus tashidak agi menea teimba teimba küma aor, oda oda asen Nagaland state anasatiba Assam tashi menepa aruba asenoki osang kaket tem nung angur aser angashir. Iba ama tensa ka nung asen Naga lima nunga iba tashidak wara agi nisung kar dak danga menepatokra koda asütsü, kong ayutsü ta kanga shisabulua bilemer, kechiba süra tang asen Nagaland State jenjang reprangdangra asenok ajaki meteta dang lir. Küm shia küm tetenzük dang “financial Year” nung sentsüh nungi tenzüker sentsüh nung atemer. Ano Government mozü ki tem reprangdangra agi (normal) shirangertem asoshia yipden peria maka den shirangertem asoshi tajemtsü tzü bottle ka ta maka ta asüba tia ka nung asen Naga nunger litepdagi. Tangar lima America, China, France, Italy lima nungbo Government Hospitals pei ki dang nungi tajungtiba merüka junga ayur, anepdang aonung mapang aben mozützü agi shitaka anepalur. Ibaji dang masü saka iba tashidak pokteter külen manger mesangwa tsüngda nung shiranger nisung (patient) aika yutettsüsa Hospital tajung aser tulu renemtetba angazüker. Saka asen lima mozüki tem reprangdangra iba ama wara tesashiji nisung o nisung na tsüngda nungi menatepa masü, saka Government mozüki nungiang tenzüka menatsü mesüka aliba angur. Angazükba agi iba corona virus dak tashidak agi meneper alirtemji takdang balaka (Separate) nung dang yur Doctor Nurse temi dang reparanga atar. Kechiba süra iba wara agi meneper den yariteper anasatiba dak tama mela-mela atemer iba ama tensa ka nung asen lima-a iba wara agi menepa tokra koda asütsü, asenokbo asen Teyanglur dak dang nünglokja Pa dang nungi kümzüktsü tashi meshia atatsü mapang tongogo. Anungji amangbpur ajaki iba tashidak agi memeneptsü asoshi sarasademtsüla. Tang iba ama tashidak wara tamajung agi menepa mapang yagi asen lima-a yimsüsürtem Government nung tongti ketdangsertem ajaki Government mozükitem ajak ya asenok asoshi taneptsü angudak ta tali terajemba nung mozükitem anepalutsü tenzüktsüla aser ibaji nüburtem ola asütsü.