Okadak Nathuram Godse-i jembiba sangdongtsüla: CIC

New Delhi, February 20 (Agencies): Central Information Commission (CIC)-i National Archives of India (NAI) dang, linük tebuti, Mahatma Gandhi tepsetsang, Nathuram Godse-i okadak jembiba otemji nenok indang website nung sangdongang, ta tetuyuba ka agütsüogo.
Ashutosh Bansal-i temepishiba ka benokba angadangba sülen Information Commissioner, Sridhar Acharyulu-i, Mahatma Gandhi tepsetba dak sentakba nung Godse-i jembiba o ajakji sangdongtsüla, ta ashi.
Iba tetuyuba nungji Acharyulu-i, “Godse aser pa den külemi aitsürtem den ai-aura makatsüa akok, ajisüaka pai jembiba otem sangdongtsü atema mepishibaji onoki magitsü makok,” ta shia lir.
Hindu right-wing activist, Nathuram Godse-i 1948 küm January 30 nü Mahatma Gandhi kahseta liasü.
Temepishiba benoksang, Ashutosh Bansal-i, Godse anema ken o agütsüba aser pai jembiba otemji Delhi Police-i agütsütsüla, ta takhangba agütsü. Item record ji Delhi police-i National Archives of India ket nung agütsü.
National Archives-i Bansal dang records ji reprangshiang aser nüngdakba osangtemji agitetang ta ashi, ajisüaka nüngdakba osangtem manguba ajanga pai Information commissioner ajuru.
Acharyulu-i CIC dang photocopy atema tapak ka nung sen 3 memeshitsüla, kechiyong Right to Information Act, Public Records Act kübok ibaji memelar, ta ashi.
Acharyulu-isa, “Commission-isa National Archives of India dang, Mahatma Gandhi tepsetba indang parnok official website nung aliba osangtem sangdongtsü tuyur, iba den külemi archive ka tenteta digitised records densemtsü aser Section 4(1)(b) kübok lenmang balala nungi iba dak sentakba osang bendentsü tuyur,” ta metetdaktsü.
Paisa NAI dang, temepishiba benoksangi meshiba ama iba tetuyuba agütsüba anogo nungi tenzüka anogo 20 tsüngda kaket tapak shia sen 2 agi ken o agütsüba certified copies aser archives nung aliba Godse-i jembiba otem CDs agütsütsüla, ta metetdaktsü.