Okadak tashiyim amshiba atema Kejriwal-i Modi aitsü

New Delhi, Feb. 18 (Agencies): Linük anema inyakba ken o nung tai tonglokja Jawaharlal Nehru University Students Union (JNUSU) Tir, Kanhaiya Kumar apuba ken o dak sentakba nung Brihostibarnü Delhi chief minister, Arvind Kejriwal-i anir par Cabinet minister temi Tir, Pranab Mukherjee ajurua linük yimtiba nung tensa onük nung o lemtepogo.
Tesülen osangbenertem den jembidang Kejriwal-i, “Delhi nung tzüzüng-ozüng tensa raksaba indang ni Tir dang shiogo. Onoki Centre nem iba tensa azüokdaktsüner,” ta ashi.
Bodbarnü okadak ken o angadangtsü atema Patiala House Court-i arur kaketshirtem aser osangbenertem dak obendangertemi teka sangshia liasü.
Centre sorkar aija Kejriwal-i, “Kechiba osangbenertem dak azüker O.P. Sharma (BJP MLA) aser nisung tamajungertemji tang tashi sademsadema senzür (?) Police tashi ajungaji Centre sorkar kübok lir. Centre sorkari kaketshir pezü pua marutetra, parnoki Pathankot amakertem pua arutetdi ma (?)” ta asüngdang.
Feb. 15 nü JNU kaketshirtem aser osangbenertem dak azükba sülen Supreme Court-i Kanhaiya Kumar kümzüka ayutsü asoshi Delhi Police dang tuyua liasü, ajisüaka Bodhbar nü pa okadaki aodang obendangertemi pa dak teka sangshia liasü.
“Iba building (court) telungtet metre 200 tsüngda Supreme Court tetuyuba meinyaktetra , linük Temzüng aser ozüng mebenoktettsü. Centre sorkar aser Ato kilonser kijai tashi ambangyima amshitsü. Iba ya linük atema lendong tulu lir,” ta paisa ashi.
Kejriwal-i, kari Delhi Police dang tetuyuba agüja aliba ajanga okadak rara adokdang police-i repranga dang ata, ta aitsü.
“Iba tetezü, Hombar aser Bodhbarnü atalokbaji Centre sorkar tai ajanga lir,” ta pai ashi.
Police-a liaka obendangertemi kaketshirtem aser osangbenertem dak azükba aija Kejriwal-i, “Delhi police ya uniform agiba force ka lir. Par kiburi kecha teinyak ta shira parnoki kecha meinyaktsü. Kiburi parnok dang injang kahlokjang ta shira parnoki akahtsü. Parnok kiburji Centre sorkar. Iba ya Ato kilonser kijai tashi amshiba lir,” ta ashi.
“Onoki item onük Tir matsüngdang benokogo. Yimyim ayimer lanuirtemji parnoki pua marutet. Iba ama police force ji maksütsür,” ta paisa shisem.