Okadaki IPL Spot Fixing ken o agienogo

New Delhi, July 25 (Agencies): Delhi nung tentetba okadaki India cricket team nungi asayar Sreesanth dena parnok 36 prongla IPL-6 spot fixing ken o nungi tanü Honibar nü agienogo.
Parnok den külemi, tang bail nung chioka aliba IPL asayar, Ajit Chandila aser Ankeet Chavan nata iba ken o nungi agienogo. Iba ken o nung ozüng anema mapa inyaker tetsüti, Dawood Ibrahim aser pa den yariteper, Chhota Shakeel na dena parnok nisung 6 tashi aija lir.
Cricket asayar tenüngtem ken o nungi agienba osangji Additional Sessions Judge, Neena Bansal Krishna-i metetdaktsü.
Iba osang angazükba sülen Sreesanth nüktzü alua ajeb aser tanüngba asayartem azütepa pelatepa liasü.
“Tatemsa shitakba obendang nguogo. Tsüngremi mulungba ka süra ni cricket maneni asayatsü,” ta Sreesanth-i ashi.
Iba ken o nung parnok 42 tashi tenüng teta liasü saka par 6 jena ao.
“Spot fixing aser betting market” nung tetsüti, Dawood aser Shakeel na ajanga IPL spot fixing tenzükba osang bushitetogo ta Police-i metetdaktsü.